ऋषिकेश बामणे
शालेय आणि महाविद्यालयीन मुलांसाठी उन्हाळ्याची सुट्टी ही मनोरंजनाची मेजवानी असते. यापैकी बहुतांश मुले या काळात विविध ठिकाणच्या भटकंतीला पसंती देतात, तर काही जण शारीरिक तंदुरुस्ती जपण्यासाठी आणि स्वत:च्या आवडत्या खेळात अधिक परिपूर्ण होण्यासाठी उन्हाळी क्रीडा शिबिरांमध्ये सहभागी होतात. यंदा मात्र या शिबिरांची जागा ऑनलाइन प्रशिक्षणाने घेतली आहे.
करोना साथीच्या वाढत्या प्रादुर्भावामुळे या वर्षीही राज्यातील क्रीडा मैदाने ठप्प असल्याने उन्हाळी क्रीडा शिबिरांचे आयोजन अशक्य आहे. त्यामुळे सलग दुसऱ्या वर्षी मुलांना प्रत्यक्षात मैदान अथवा प्रशिक्षण केंद्र गाठून या शिबिरांचा लाभ घेणे कठीण आहे. मात्र काही क्रीडा प्रशिक्षकांनी सध्याच्या आव्हानात्मक परिस्थितीवरही तोडगा काढून ऑनलाइन शिबिराचा आणि क्रीडा प्रशिक्षणाचा पर्याय निवडला आहे. त्यामुळे क्रिकेट, नेमबाजी, जिम्नॅस्टिक्स यांसारख्या खेळातील मूलभूत घटकांवर लक्ष केंद्रित करण्याबरोबरच घरबसल्या करता येणाऱ्या व्यायाम प्रकारांकडे मुलांची रुची वाढलेली पाहायला मिळत आहे. मुलांबरोबरच त्यांचे पालकही ऑनलाइन शिबिराला प्राधान्य देत आहेत.
ऑनलाइन प्रशिक्षणाचा पर्याय अनेकांना न पटण्यासारखाही आहे. मुळात उन्हाळी शिबिराचे मुख्य उद्दिष्ट हे मुलांना एखाद्या खेळाची तोंडओळख करून देण्यासाठी तसेच शारीरिक तंदुरुस्तीचे महत्त्व पटवून देणे, हे असते. मात्र ऑनलाइन मार्गदर्शनादरम्यान मुलांपर्यंत योग्य माहिती पोहोचते आहे की नाही. त्याशिवाय फावल्या वेळेत शिबिरांदरम्यान दिलेल्या सूचनांचे ते पालन करत आहेत की नाही, याची पूर्ण कल्पना मिळणे कठीण आहे. गेल्या वर्षभरापासून प्रामुख्याने शालेय मुलांचा ऑनलाइन प्रशिक्षणाशी संबंध वाढल्याने पुन्हा अशा शिबिरांत सहभागी झाल्यामुळे त्यांच्यावर विपरीत परिणाम होण्याचीही शक्यता आहे.
येत्या काळात स्थिती सुधारण्याची अपेक्षा असली तरी सध्या मात्र ऑनलाइन शिबिरांचाच पर्याय सर्वसामान्यांकडे उपलब्ध असल्याने या संधीचा पुरेपूर लाभ उचलण्यातच पालक आणि मुले समाधान बाळगत आहेत.
गेल्या काही दिवसांपासून ऑनलाइन शिबिरांसाठी मला अनेक पालक संवाद साधत आहेत. परंतु गेल्या वर्षभरापासून अभ्याससुद्धा ऑनलाइन माध्यमातूनच करावा लागल्याने मुलांना या गोष्टींचा त्रास होण्याची भीती आहे. सध्या जी मुले स्पर्धात्मक पातळीवर खेळतात, ते मात्र ऑनलाइन प्रशिक्षणादरम्यान दिलेल्या आदेशांचे पालन करत आहे. लवकरच ही स्थिती सुधारेल, अशी आशा आहे.
– वर्षा उपाध्ये, लयबद्ध जिम्नॅस्टिक्सच्या प्रशिक्षक
क्रिकेटची मैदाने बंद असली तरी आमचे ऑनलाइन प्रशिक्षण सुरू आहे. खेळाडूंना किमान खेळाशी जोडून ठेवण्यासाठी ऑनलाइन प्रशिक्षण उपयुक्त ठरत आहे. त्यामुळे फलंदाजी, गोलंदाजी करताना लक्षात ठेवण्याचे बारीक मुद्दे त्यांना स्पष्टपणे सांगता येतात.
– सौरभ जगताप, क्रिकेट प्रशिक्षक
नेमबाजीमध्ये ऑनलाइन प्रशिक्षणाचा पर्याय गेली अनेक वर्षे प्रचलित आहे. त्यामुळे अन्य खेळांच्या तुलनेत नेमबाजांना या आव्हानात्मक काळातही स्वत:च्या तंत्रावर तसेच तंदुरुस्तीवर अधिक मेहनत घेण्याची संधी मिळत आहे. खेळाडूंना सराव करताना त्याचे चित्रीकरण करून मी मोबाइलवर व्हिडीओ पाठवण्यास सांगते. त्यामुळे ऑनलाइन प्रशिक्षणादरम्यान लक्ष देता आले नाही, तर या कृतीद्वारे मी त्यांच्या चुकांची दुरुस्ती करू शकते.
– लीना शिरोडकर, आंतरराष्ट्रीय नेमबाज आणि प्रशिक्षक
