भारतीय खेळांडूना अडीच लाखांचा इटालियन सूट देण्याचा सीईओंचा प्रस्ताव बीसीसीआयने फेटाळला

टीम इंडियातील खेळाडूंसाठी प्रत्येकी अडीच लाख रूपये किंमतीचा इटालियन सूट शिवून घेण्याचा प्रस्ताव भारतीय क्रिकेट नियामक मंडळाकडून (बीसीसीआय) फेटाळण्यात आल्याचे कळते. बीसीसीआयचे मुख्य कार्यकारी अधिकारी (सीईओ) राहुल जोहरी यांनी हा प्रस्ताव मांडला होता. मात्र, लोढा समितीच्या अहवालानंतर न्यायालयाकडून बीसीसीआयच्या आर्थिक कारभारावर करडी नजर ठेवण्यात येत आहे. या इटालियन सूटसाठी इतका खर्च झाल्यास ही उधळपट्टी वादाचा विषय बनू शकते. त्यामुळेच बीसीसीआयमधील वरिष्ठ पदाधिकाऱ्यांनी खेळाडूंच्या इटालियन सूटचा प्रस्ताव नाकारल्याचे समजते.
राहुल जोहरी यांनी भारतीय संघातील खेळाडू आणि वरिष्ठ पदाधिकाऱ्यांसाठी एकुण ५० सूट तयार करून घेण्याचा हा प्रस्ताव ईमेलद्वारे अनुराग ठाकूर, अजय शिर्के आणि अन्य सदस्यांना पाठवला होता. भारतीय संघाला निश्चितपणे नव्या फॉर्मल कपड्यांची गरज आहे. या प्रत्येक सूटची किंमत अडीच लाख इतकी आहे. अशाप्रकारेच ५० सूट तयार करून घेण्याचा आमचा विचार आहे, असे राहुल जोहरी यांनी ईमेलमध्ये म्हटले होते.