WTC Final 2025: ऑस्ट्रेलियाचा पराभव नेमका कुणामुळे झाला? पॅट कमिन्सने सांगितलं दारूण पराभवाचं कारण

या पराभवानंतर बोलताना ऑस्ट्रेलियाचा कर्णधार पॅट कमिन्स म्हणाला, ” गोष्टी खूप लवकर बदलू शकतात, पण दुर्दैवाने आमच्यासाठी हे थोडं अवघड होतं. आम्हाला पहिल्या डावात चांगली आघाडी मिळाली होती. आम्ही त्यांना सामन्यातून बाहेर ठेवण्याचा पूर्ण प्रयत्न केला. पण तसं होऊ शकलं नाही. गेली दोन वर्ष सर्वकाही चांगलं होतं. पण या सामन्यात तसं काही घडलं नाही.”

पॅट कमिन्सने विरोधी संघातील खेळाडू एडेन मारक्रमचं कौतुक केलं. तो म्हणाला, ” या सामन्यात नॅथन लायन धोकादायक ठरू शकला असता, पण त्याला विकेट मिळाली नाही. एडेनने अप्रतिम खेळी केली. दक्षिण आफ्रिका संघ खऱ्या अर्थाने विजेता ठरला आहे. त्यांनी स्वतःला शेवटपर्यंत सामन्यात टिकवून ठेवलं आणि संधी मिळताच संधीचं सोनं केलं.”

या सामन्याबद्दल बोलायचं झालं तर, पहिल्या डावात फलंदाजीसाठी आलेल्या ऑस्ट्रेलियाला २१२ धावा करता आल्या. ऑस्ट्रेलियाकडून स्टीव्ह स्मिथने ६६ तर बेवस्टरने सर्वाधिक ७२ धावांची खेळी केली. या धावांच्या प्रत्युत्तरात दक्षिण आफ्रिकेला १३८ धावा करता आल्या. ऑस्ट्रेलियाने पहिल्या डावात ७४ धावांची आघाडी घेतली. दुसऱ्या डावात ऑस्ट्रेलियाला हवी तशी सुरूवात करता आली नाही. अवघ्या ७३ धावांवर दक्षिण आफ्रिकेचे ७ फलंदाज तंबूत परतले होते. शेवटी मिचेल स्टार्कने अर्धशतकी खेळी करत संघाची धावसंख्या २०० पार पोहोचवली. दक्षिण आफ्रिकेला हा सामना जिंकण्यासाठी २८२ धावा करायच्या होत्या. या धावांचा पाठलाग करताना एडेन मारक्रमन शतकी आणि बावूमाने अर्धशतकी खेळी करत संघाला ५ गडी राखून विजय मिळवला.