श्रीकांत वाघचे पाच बळी

पहिल्या दिवसअखेर ३ बाद २२७ अशी सावध सुरुवात करणाऱ्या महाराष्ट्राला मोठी धावसंख्या उभारण्यात अपयश आले. पदार्पणातच शतकवीर होण्याचा मान पटकावणाऱ्या विराग आवटेला आपल्या धावसंख्येत केवळ १५ धावांची भर घालता आली. तो १२६ धावा करून श्रीकांत वाघच्या गोलंदाजीवर बाद झाला. विराग वगळता अन्य कोणत्याही फलंदाजाला श्रीकांतच्या भेदक गोलंदाजीचा सामना करता आला नाही आणि महाराष्ट्राचा डाव २८२ धावांत आटोपला. श्रीकांतने २३ धावांत ५ बळी टिपले. प्रत्युत्तरादाखल खेळताना विदर्भाची सुरुवातही खराब झाली.
शिवसुंदर दास आणि उर्वेश पटेल प्रत्येकी ५ धावा करून बाद झाले. शलभ श्रीवास्तव १९ धावांवर तोही बाद झाला. एकामागोमाग एक साथीदार बाद होत असताना सलामीवीर फैझ फझलने एकाकी झुंज दिली. त्याला साथ मिळाली ती अनुभवी हेमांग बदानीची. दुसऱ्या दिवसाचा खेळ संपला तेव्हा विदर्भाच्या ३ बाद १२३ झाल्या आहेत.
फझल ५९ तर बदानी २५ धावांवर खेळत आहे. विदर्भ अजूनही १५९ धावांनी पिछाडीवर आहेत.