स्मिथच्या दुग्धशर्करा योगावर पाकिस्तानच्या गोलंदाजांचे विरजण

कर्णधारपदाची १००वी कसोटी आणि ३३व्या वर्षांत पदार्पण असा दुग्धशर्करायोग दक्षिण आफ्रिकेचा कर्णधार ग्रॅमी स्मिथसाठी शुक्रवारी जुळून आला होता. मात्र पाकिस्तानविरुद्धच्या जोहान्सबर्ग येथील पहिल्या कसोटीत स्मिथ २४ धावांवरच बाद झाला. त्याचबरोबर पाकिस्तानच्या कामचलाऊ गोलंदाजांनी दक्षिण आफ्रिकेचा पहिला डाव २५३ धावांवर संपुष्टात आणत स्मिथच्या या दुग्धशर्करा योगावर विरजण पाडले. वाँडर्स स्टेडियमच्या वेगवान गोलंदाजांना साथ देणाऱ्या खेळपट्टीवर दक्षिण आफ्रिकेच्या फलंदाजांनी पाकिस्तानच्या वेगवान गोलंदाजांना समर्थपणे उत्तर दिले. पण त्यांचे पाच फलंदाज युनूस खान आणि मोहम्मद हाफीझ या कामचलाऊ फिरकी गोलंदाजांचे शिकार ठरले. युनुसने हाशीम अमलाचा अडसर दूर केला. तर हाफीझने चार फलंदाजांना माघारी पाठवले. पाकिस्तानने पहिल्या दिवसअखेर बिनबाद ६ धावा केल्या आहेत.