पोर्ट एलिझाबेथ : बेन स्टोक्स (१२०) आणि ऑली पोप (नाबाद १३५) यांच्या शतकांच्या जोरावर इंग्लंडने तिसऱ्या कसोटीत दक्षिण आफ्रिकेविरुद्ध पहिला डाव ९ बाद ४९९ धावांवर घोषित केला. ४ बाद १४८ या स्थितीतून स्टोक्स आणि पोप यांनी इंग्लंडचा डाव सावरला. या दोघांनी पाचव्या गडय़ासाठी २०३ धावांची दणदणीत भागीदारी केली. दक्षिण आफ्रिकेकडून डावखुरा फिरकीपटू केशव महाराजने पाच बळी घेतले. दिवसअखेर दक्षिण आफ्रिकेची पहिल्या डावात २ बाद ६० धावा अशी स्थिती झाली आहे. रबाडावर एका सामन्याची बंदी इंग्लंडचा कर्णधार जो रूटला बाद केल्यानंतर आक्षेपार्हरीत्या जल्लोष केल्यामुळे दक्षिण आफ्रिकेचा वेगवान गोलंदाज कॅगिसो रबाडाला कसोटी मालिकेतील चौथ्या लढतीला मुकावे लागणार आहे.
