नोव्हेंबर महिन्यात सुरु होणाऱ्या हॉकी विश्वचषकाआधी भारतीय संघाला मोठा धक्का बसण्याची शक्यता आहे. संघाच्या आघाडीच्या फळीतला महत्वाचा खेळाडू एस. व्ही. सुनील गुडघ्याच्या दुखापतीमुळे संघात सहभागी होणार नाहीये. 4 ऑक्टोबर रोजी भारतीय संघाच्या सराव शिबीरात सुनीलला ही दुखापत झाल्याचं समजतं आहे. या दुखापतीमधून सावरण्यासाठी सुनीलला 4 आठवड्यांचा कालावधी लागण्याची शक्यता आहे. 28 नोव्हेंबर ते 16 डिसेंबर दरम्यान ओडीशातील भुवनेश्वर येथे हॉकी विश्वचषकाचं आयोजन करण्यात आलेलं आहे. त्यामुळे सुनीलला झालेली दुखापत पाहता त्याला संघात जागा मिळण्याच्या सर्व शक्यता मावळलेल्या दिसत आहेत. पीटीआयशी बोलत असताना, सुनीलने आपल्याला झालेल्या दुखापतीविषयी माहिती दिली. सध्या सुनील हॉकी इंडियाच्या अधिकृत डॉक्टरांकडून वैद्यकीय सल्ला घेण्यासाठी दिल्लीला रवाना झाला आहे. या दुखापतीनंतरही सुनील संघातील सहभागाबद्दल सकारात्मक आहे. माझी दुखापत लवकर बरी झाल्यास मी संघात सहभागी होऊ शकतो, मात्र त्याला झालेली दुखापत पाहता हॉकी इंडिया हा धोका पत्करेल का हा मोठा प्रश्नच आहे.
