एकाच घरात राहणे, पण फाळणीनंतर कट्टर शत्रू झालेल्या पाकिस्तान आणि बांगलादेश यांच्यामध्ये रविवारी कडवी झुंज पाहायला मिळेल. पाकिस्तानने दोन सामन्यांपैकी एक जिंकला असून एक सामना गमावला आहे. त्यांच्या खात्यात दोन गुण असून हा सामना जिंकल्यास त्यांना उपांत्य फेरीच्या दिशेने कूच करता येईल. पण जर त्यांनी हा सामना गमावला तर त्यांच्यावरही स्पर्धेतून गाशा गुंडाळण्याची वेळ येऊ शकते. दुसरीकडे बांगलादेशला दोन सामन्यांपैकी एकही सामना जिंकता आला नसल्याने ते सध्या विजयासाठी आतुर असतील. त्यांच्यामध्ये मोठय़ा संघाला धक्का देण्याची कुवत असून पाकिस्तानचा संघ गाफील राहिला तर त्यांच्यासाठी ही लढत नक्कीच सोपी नसेल.