भाजपाच्या राष्ट्रीय कार्यकारिणीत स्थान मिळाल्यानंतर पंकजा मुंडे यांची पहिली प्रतिक्रिया समोर आली आहे. पंकजा मुंडे यांनी ट्विट करुन याबद्दल आपली प्रतिक्रिया नोंदवत पक्षाने माझ्यावर जो विश्वास दाखवला त्याबद्दल मी त्यांची आभारी आहे असं म्हटलं आहे. पंतप्रधान नरेंद्र मोदी, केंद्रीय गृहमंत्री अमित शाह, भाजपाचे राष्ट्रीय अध्यक्ष जे. पी. नड्डा यांची मी आभारी आहे. मला राष्ट्रीय कार्यकारिणीत जे स्थान देण्यात आलं आणि मला जे पद देण्यात आलं तो मी माझा सन्मान समजते असंही त्यांनी म्हटलं आहे.

भाजपा नेत्या पंकजा मुंडे आणि माजी मंत्री विनोद तावडे या दोघांनाही भाजपाच्या राष्ट्रीय कार्यकारणीत स्थान देण्यात आलं आहे. भाजपाने आज राष्ट्रीय कार्यकारिणी जाहीर केली. यामध्ये राष्ट्रीय मंत्री म्हणून पंकजा मुंडे, विनोद तावडे यांचा समावेश करण्यात आला आहे. तसंच विजया रहाटकर आणि सुनील देवधर यांना राष्ट्रीय सचिव ही जबाबदारी देण्यात आली आहे. हा निर्णय झाल्यानंतर पंकजा मुंडे यांनी ट्विट करुन पंतप्रधान नरेंद्र मोदी, केंद्रीय गृहमंत्री अमित शाह यांचे आभार मानले आहेत.