सिन्नरजवळ अपघातात चार ठार, १९ जखमी

सिन्नर-घोटी मार्गावर बुधवारी रात्री एक वाजता टेम्पो ट्रॅव्हलर आणि सुमो यांची धडक होऊन झालेल्या अपघातात चार ठार तर १९ प्रवासी जखमी झाले. मृत व जखमी हे अहमदनगर व कल्याण परिसरातील आहेत.
सिन्नर-घोटी महामार्गावरील बेलू शिवारात हा अपघात झाला. कल्याणहून शिर्डी येथे दर्शनासाठी भाविकांना घेऊन जाणारा टेम्पो ट्रॅव्हलर आणि अहमदनगर जिल्ह्यातील भाविकांना इगतपुरी येथे कानिफनाथ मंदिरात दर्शनासाठी घेऊन जाणारी सुमो या दोन वाहनांमध्ये हा अपघात झाला. त्यात सुमोतील जगन बाजीराव कारगिले (६५, रा. पाथर्डी), बबाबाई तुळशीराम गाडेकर (६०, वडगाव, पाथर्डी), सुधाकर उमाजी गोरे (५२, रांजणी) यांच्यासह टेम्पो ट्रॅव्हलरमधील स्वप्निल रमाकांत गडाख (२१, चिंचपाडा, कल्याण) हे चौघे जागीच ठार झाले. अपघातात दोन्ही वाहनांतील एकूण १९ जण जखमी झाले. अपघाताची माहिती मिळताच स्थानिक ग्रामस्थांनी धाव घेऊन जखमींना अपघातग्रस्त वाहनातून बाहेर काढले. दरम्यानच्या काळात सिन्नर पोलिसांनी धाव घेऊन जखमींना रुग्णालयात हलविले. या प्रकरणी सिन्नर पोलीस ठाण्यात गुन्हा दाखल करण्यात आला आहे.