जमीन खरेदीच्या काही विशिष्ट नोंदी करून सात-बारा उतारा देण्यासाठी सात हजार रुपयांची लाच स्वीकारताना गुरुवारी दुपारी निफाड तालुक्यातील सजा देवगावचे तलाठी त्र्यंबक पोपट मवाळ याला लाचलुचपत प्रतिबंधक विभागाने रंगेहाथ ताब्यात घेतले.
वडिलांनी नावे केलेल्या एक गुंठा जमिनीच्या खरेदीचे इंडेक्स २ वरून तलाठी यांच्या १० ड मध्ये नोंद करून तसा सात-बारा उतारा देण्यासाठी मवाळने सात हजार रुपयांची तक्रारदाराकडे मागणी केली होती. या संदर्भात लाचलुचपत प्रतिबंधक विभागाकडे तक्रार करण्यात आल्यानंतर गुरुवारी सापळा रचण्यात आला. त्यानुसार दुपारी साडेचार वाजताच्या सुमारास निफाड तहसीलदार कार्यालयाच्या बाहेरील हॉटेलमध्ये ही रक्कम स्वीकारत असताना मवाळला पकडण्यात आले. पोलीस अधीक्षक डॉ. शशिकांत महावरकर यांच्या मार्गदर्शनाखाली पोलीस निरीक्षक एस. व्ही. अहिरराव यांच्या पथकाने ही कामगिरी पार पाडली. शासकीय कार्यालयात कोणीही अधिकारी वा कर्मचारी अथवा त्यांच्यावतीने कोणी खासगी व्यक्ती लाचेची मागणी करीत असल्यास नागरिकांनी लाचलुचपत प्रतिबंधक विभागाशी ०२५३-२५७५६२८, २५७८२३० अथवा ९१५८२ ४२४२४ या क्रमांकावर संपर्क साधावा, असे आवाहन करण्यात आले आहे.