नाशिकमध्ये मध्यरात्री ज्वेलर्सचे दुकान फोडले

येथील राजीवनगर परिसरातील पिंगळे ज्वेलर्सचे दुकान शनिवारी मध्यरात्री अज्ञात चोरटय़ांनी फोडून ११० गॅ्रम सोने व सात किलो चांदी असा तब्बल सात लाख रुपयांचा ऐवज लुटला. या प्रकरणी इंदिरानगर पोलीस ठाण्यात गुन्हा दाखल करण्यात आला असून पोलीस पुढील तपास करत आहेत.
याबाबत अधिक माहिती अशी की, प्रमोद पिंगळे (रा. चेतनागर) यांचे किशोरनगर येथील विवेक अपार्टमेंटमध्ये पिंगळे ज्वेलर्स हे दुकान आहे. शनिवारी मध्यरात्रीच्या सुमारास अज्ञात चोरटय़ांनी दुकानाला लावलेले सात टाळे तोडून तीनशे किलो वजनाची तिजोरी लंपास केली. तिजोरीत ११० गॅ्रम सोने व सात किलो चांदी असा तब्बल सात लाख रुपयांचा ऐवज चोरटय़ांनी लंपास केला. प्रमोद पिंगळे हे सकाळी मॉर्निग वॉकला जात असताना दुकानात चोरी झाल्याचे त्यांना समजले. परिसरातील नागरिकांच्या माहितीनुसार रात्री १२ ते पहाटे ४ वाजेच्या सुमारास ही चोरी झाल्याचा अंदाज असून त्यात एका चारचाकी वाहनाचा वापर झाल्याचा अंदाज आहे. नगरसेवक सतीश सोनवणे यांनी बसविलेल्या सीसीटीव्ही कॅमेऱ्यात या दरम्यान एका काळ्या रंगाच्या स्कॉर्पियो गाडी गेल्याचे फुटेज मिळाले असून त्या गाडीचा वापर झाला आहे की नाही, याचा तपास पोलीस करीत आहेत. या प्रकरणी इंदिरानगर पोलीस ठाण्यात गुन्हा दाखल करण्यात आला असून पोलीस पुढील तपास करीत आहेत.