लोकांची वाट पाहत पवारांची दोन तास प्रतीक्षा!

लोकसभा निवडणुकीच्या प्रचाराचा प्रारंभ करण्यासाठी निश्चित केलेल्या वेळेनुसार केंद्रीय कृषिमंत्री शरद पवार यांचे गेवराईत आगमन झाले. मात्र, सभास्थळी कोणीच नसल्यामुळे तब्बल दोन तास पवारांना आमदार बदामराव पंडित यांच्या घरी थांबावे लागले! परस्परविरोधी आमदार बदामराव पंडित व अमरसिंह पंडित राष्ट्रवादीच्या झेंडय़ाखाली एकत्र झाल्यानंतर पहिल्याच जाहीर सभेत दोन्ही पंडितांच्या कार्यकर्त्यांनी घोषणाबाजीत शक्तिप्रदर्शन करण्याचा प्रयत्न केला. पण गरिबांत मिसळणाऱ्या, सुख-दु:खात सामील होणाऱ्या बदामराव पंडित यांच्या भविष्यातील राजकीय वाटचालीत अमरसिंह पंडित यांची साथ मिळेल, असे जाहीर करीत विधानसभेच्या उमेदवारीचा प्रश्न अप्रत्यक्षपणे निकाली काढून टाकला, असे मानले जात आहे.
बीड लोकसभेसाठी राष्ट्रवादीचे उमेदवार सुरेश धस यांच्या प्रचारार्थ शनिवारी पवार यांची पहिली सभा झाली. नात्याने काका-पुतणे असलेले विधानसभेचे आमदार बदामराव पंडित व विधान परिषदेचे आमदार अमरसिंह पंडित या निमित्ताने राष्ट्रवादीच्या झेंडय़ाखाली एकत्र आले. यानंतर त्यांच्याही एकत्रिकरणाची ही पहिलीच सभा झाली. दोन्ही पंडितांच्या कार्यकर्त्यांनी सभास्थळी घोषणाबाजी करीत एकत्र आलो तरी स्वतचे अस्तित्व कायम असल्याचे नेतृत्वाला दाखवून दिले.
नियोजित सभा सकाळी दहाची होती. त्यानुसार पवार हेलिक ॉप्टरने वेळेवर पोहोचले; पण सभास्थळी कोणीच नसल्याचे पाहून लोकांच्या उपस्थितीच्या प्रतीक्षेत पवार यांना दोन तास थांबावे लागले. दुपारी बारा वाजता सभास्थळी पवारांचे आगमन झाले, त्यावेळीही फारशी गर्दी नव्हतीच. पालकमंत्री क्षीरसागर यांनी गेवराईत दोन्ही पंडित एकत्र आल्यामुळे हा मतदारसंघ जिल्हय़ात सर्वात जास्त मताधिक्य देईल, अशी अपेक्षा व्यक्त केली. अमरसिंह पंडित हे विधान परिषदेवर असल्यामुळे त्यांच्याकडे ६ वष्रे आमदारकी आहे आणि ६ महिन्यांनी बदामराव पंडित यांना निवडणुकीला सामोरे जावे लागणार आहे, असे सांगत राष्ट्रवादीची उमेदवारी बदामराव यांना मिळेल, असे संकेत दिले.
हाच धागा पकडून पवार यांनीही सर्वसामान्यांत मिसळणारा, गोरगरिबांच्या दुखात सामील होणारा कार्यकर्ता म्हणून तालुक्यातील जनता बदामराव यांना निवडून देत आहे. आगामी काळातही बदामराव पंडित यांच्या वाटचालीत अमरसिंह पंडित यांची साथ असेल, असे जाहीर सांगत एक प्रकारे विधानसभा उमेदवारीचा विषयच निकाली काढला. दोन्ही पंडित एका पक्षात आले असले, तरी आगामी निवडणुकीत उमेदवारीवरून जोरदार चर्चा असते. पवारांच्या जाहीर वक्तव्याने उमेदवारीचा विषय स्पष्ट झाल्याचे मानले जात आहे. उमेदवार धस यांनी भाजप खासदार गोपीनाथ मुंडे यांच्यावर जोरदार टीका करत मुंडे दर दहा किलोमीटरला स्वतचे मंत्रिपद बदलतात, असे सांगत त्यांना नेमके काय व्हायचे हे ठरवावे, असे आवाहन करीत बीड जिल्हा बँकेच्या डबघाईला मुंडेच जबाबदार असल्याचा आरोप केला.
गेवराईत दोन्ही पंडित मोठे आहेत, त्यांच्या स्पध्रेत आपली झोपडी मोडू नये याचे त्यांनी लक्ष ठेवावे, असा टोलाही लगावला. अमरसिंह पंडित यांनी जिल्हा बँकेच्या पापात आपणही वाटेकरी आहोत, अशी कबुली देत जिल्हा बँक प्रकरणात गोपीनाथ मुंडे दरोडेखोरच आहेत, असा घणाघाती हल्ला केला. आमदार धनंजय मुंडे यांनी खासदार मुंडेंकडे आता जादू नाही, फक्त कांडी राहिली आहे. त्यांना खोटं बोलण्याच्या स्पध्रेत पाठवले तर ते बक्षीस मिळवतील. त्यांना ज्यांनी दैवत मानले त्या सर्वाची राजकारणात वाट लागली. त्यात आपलाही नंबर असल्याचे त्यांनी सांगितले.