जळगाव : शिवसेना शिंदे गटाचे आमदार किशोर पाटील यांनी धमकी दिलेल्या पाचोरा येथील पत्रकाराला पालिकेसमोर बुधवारी सायंकाळी टोळक्याने लाथाबुक्क्यांनी बेदम मारहाण केली. संदीप महाजन असे मारहाण झालेल्या पत्रकाराचे नाव असून, त्यांनी दिलेल्या तक्रारीवरून पाचोरा पोलीस ठाण्यात अदखलपात्र गुन्हा दाखल करण्यात आला आहे. भडगाव तालुक्यातील गोंडगाव येथील सात वर्षांच्या मुलीवरील अत्याचार आणि हत्या प्रकरणी जिल्ह्यातील वातावरण तप्त असताना पाचोरा येथील स्थानिक पत्रकार महाजन यांनी याबाबत मुख्यमंत्री एकनाथ शिंदे यांच्यावर भाष्य करीत विश्लेषणात्मक बातमी केली होती. यात त्यांनी आक्षेपार्ह बाबींचा उल्लेख केल्याचा आरोप करीत आमदार पाटील यांनी त्यांना भ्रमणध्वनीवरून संपर्क करून शिवीगाळ करीत धमकावले होते. यासंदर्भातील ध्वनिफीत समाजमाध्यमातून बाहेर आल्यानंतर आमदार पाटील यांनी शिवीगाळ केल्याचे कबूल केले होते. आमदार पाटील यांच्याकडून आपल्यासह कुटुंबीयांच्या जिवाला धोका असल्याने संरक्षण द्यावे, अशी मागणी करीत आपणास काही झाल्यास त्याला जबाबदार आमदार पाटील व त्यांचे समर्थक असतील, असे महाजन यांनी पोलिसांना दिलेल्या तक्रारीत म्हटले होते. परंतु, त्यांना संरक्षण देण्यात आले नाही. महाजन हे बुधवारी सायंकाळी दुचाकीवरून घरी जात असताना पाचोरा पालिकेसमोरील भररत्यात त्यांना चार-पाच जणांच्या टोळक्याने दुचाकीवरून खेचत लाथाबुक्क्यांनी बेदम मारहाण केली.
