वनवासी कल्याण आश्रमाचे खोपोलीतील ज्येष्ठ व निष्ठावंत कार्यकर्ते सुधांशू गोगटे (६२) यांचे १९ नोव्हेंबर रोजी लौजी-खोपोली येथील निवासस्थानी अल्पशा आजाराने निधन झाले. येथील मस्को कंपनीमधील नोकरी सांभाळून सुधांशू गोगटे गेली ३० वर्षे कर्जत येथील वनवासी कल्याण आश्रम संचालित जांभिवली येथील आश्रम शाळेचा संपूर्ण कारभार पालकत्वाच्या भूमिकेतून पाहत होते. वनवासी कल्याण आश्रम शाळेतील विद्यार्थ्यांच्या सर्वागीण विकासासाठी प्रसंगी पदरमोड करून, नि:स्वार्थ वृत्तीने व निष्ठेने अखेपर्यंत झटणाऱ्या सुधांशू गोगटे यांच्या निधनाबद्दल सर्व स्तरांतून हळहळ व्यक्त करण्यात येत आहे. त्यांच्या पश्चात पत्नी, दोन विवाहित कन्या, जावई, नातवंडे असा परिवार आहे.