मुंबई युवक काँग्रेस अध्यक्षपदावरून हटवताच झिशान सिद्दीकी आक्रमक; म्हणाले, “येत्या दोन-तीन दिवसांत…”

“न सांगताच मला पदावरून हटवण्यात आले”

“काँग्रेसने घेतलेल्या या निर्णयाची मला कोणतीही कल्पना नव्हती. हा निर्णय घेतल्यानंतर मला आश्चर्य वाटले. मी अजमेर शरीफवरून आलो आहे. मला काल या निर्णयाबाबत माहिती देण्यात आली. मला कोणताही मेल, किंवा मेसेज मिळालेला नाही. मी १२ वर्ष काँग्रेस पक्षासाठी दिलेले आहेत. मला पदावरून हटवायचेच होते तर त्यांनी मला थेट संपर्क करायला हवा होता. मात्र त्यांनी आता निर्णय घेतलेला आहे. मला समाजमाध्यमांमार्फत समजलेले आहे,” असे झिशान सिद्दीकी म्हणाले.

“मला ९० हजार लोकांनी मतदान केले होते”

“मी आता माझ्या जवळच्या लोकांशी याबाबत बोलणार आहे. उद्या किंवा परवा मी याबाबत पत्रकार परिषद घेणार आहे. माझ्यावर काय अन्याय झालेले आहेत, नेमकं काय घडलेलं आहे ते मी या पत्रकार परिषदेत सांगणार आहे. मला पदावरून का हटवण्यात आले याची मला कोणतीही कल्पना नाही. मला साधारण ९० हजार लोकांनी मतदान केले होते. त्यानंतरच मला मुंबईच्या युवक काँग्रेस अध्यक्षपदाची जबाबदारी देण्यात आली होती. मला या ९० हजार लोकांना आता उत्तर द्यावे लागेल,” असा इशारा सिद्दीकी यांनी काँग्रेस पक्षाला दिला.

“आता मी सर्वकाही सांगणार”

“अशी अनेक उदाहरणं आहेत ज्यात एकाच कुटुंबातील लोक वेगवेगळ्या पक्षाशी जोडलेले असतात. मी तर काँग्रेस पक्ष सोडण्याचा कधी विचार केला नाही. मी काँग्रेस पक्ष सोडणार असल्याची त्यांना शंका असेल तर त्यांनी माझ्याशी याबाबत चर्चा करायला हवी होती. त्यांनी मला विचारायला हवे होते. मी काँग्रेस पक्षाच्या बैठकांना हजेरी लावली. त्यानंतर अनेकांनी माझे कौतुक केले. मात्र आता माझ्यासोबत जे झाले आहे, ते मी सांगणार आहे,” असे झिशान सिद्दीकी म्हणाले.