‘कुछ कुछ होता है’ या चित्रपटाद्वारे दिग्दर्शन क्षेत्रात पदार्पण करणा-या करण जोहरने आतापर्यंत अनेक सुपरहिट चित्रपट दिले आहेत. धर्मा प्रोडक्शनअंतर्गत तयार करण्यात आलेला प्रत्येक चित्रपट हिट ठरला असून या चित्रपटांनी बॉक्स ऑफिसवर चांगलीच कमाई केली आहे. त्यामुळे करण आता पुन्हा एकदा प्रेक्षकांसाठी नवीन चित्रपट घेऊन येत आहे. विशेष म्हणजे या चित्रपटातून करिना आणि अक्षय यांची जोडी तब्बल नऊ वर्षानंतर एकत्र झळकणार आहे. या चित्रपटाचं नाव आता निश्चित करण्यात आलं आहे. ‘वीरे दी वेडिंग’ या चित्रपटातून चंदेरी दुनियेत पुन्हा कमबॅक करणारी करिना कपूर आता पूर्वीसारखी चित्रपटसृष्टीत सक्रिय झाली आहे. त्यामुळे ‘वीरे दी वेडिंग’ या चित्रपटानंतर ती करण जोहरच्या आगामी चित्रपटामध्ये झळकून येणार आहे. तर करिनाबरोबर अक्षयकुमारही स्क्रिन शेअर करणार आहे. त्यामुळे या चित्रपटाचं नाव निश्चित झालं असून करणने ट्वीटरवरुन ही माहिती चाहत्यांना दिली आहे. #GoodNews IS HERE! Bringing a fantastic cast of @akshaykumar, #KareenaKapoorKhan, @diljitdosanjh & @Advani_Kiara to the big screen with our debutant director @raj_a_mehta! This DRAMEDY's due date is 19th July 2019! @apoorvamehta18 @ShashankKhaitan @DharmaMovies #CapeOfGoodFilms pic.twitter.com/zIrjOxDBno — Karan Johar (@karanjohar) August 2, 2018 करिना- अक्षयच्या आगामी चित्रपटाचं नाव 'गुड न्युज' असं असून हा चित्रपट १९ जुलै २०१९ रोजी प्रेक्षकांच्या भेटीला येणार आहे. या चित्रपटाची कथा सरोगेसीवर आधारित असल्याचं सांगण्यात येत आहे. यापूर्वी २००२ मध्ये मेघना गुलजार यांनी सरोगेसीवर आधारित चित्रपटाची निर्मिती केली होती. त्याचं नाव 'फिलहाल' असं होतं. राज मेहता दिग्दर्शित 'गुड न्युज' हा चित्रपट दोन कुटुंबांच्या वैवाहिक जीवनावर आधारित असून यात करिना आईची भूमिका साकारणार आहे. तर अक्षय करिनाच्या पतीच्या भूमिकेत दिसणार आहे. विशेष म्हणजे या चित्रपटातून महत्वाचा संदेश देण्याबरोबरच रोमॅन्टिक आणि कॉमेडीचा देखील समावेश करण्यात आला आहे.