दाक्षिणात्य सिनेमाचा सुपरस्टार नागार्जुनचा छोटा मुलगा अखिल अक्कीनेनीचे काही दिवसांपूर्वीच लग्न मोडले होते. अखिलची 'एक्स' श्रीया भूपल आता एका अनिवासी भारतीयाशी लग्न करणार आहे. प्रसारमाध्यमांमध्ये आलेल्या वृत्तानुसार, श्रीयाचे आई-वडिलही या लग्नासाठी तयार आहेत. अखिल आणि श्रीया मे महिन्यात इटलीमध्ये डेस्टिनेशन वेडिंग करणार होते. अखिल-श्रीया यांच्यात काही कारणावरून बिनसले आणि दोघांनीही हे नाते थांबविण्याचा निर्णय घेतला होता. श्रीया ही प्रसिद्ध व्यावसायिक जीव्हीके रेड्डी यांची नात असून, अभिनेता नागार्जुन आणि जीव्हीके रेड्डी यांनी या दोघांचीही समजूत काढण्याचा प्रयत्न केला होता. पण, त्याचा फारसा काही परिणाम या दोघांवर झाला नाही. अखेर त्यांनी हे लग्न मोडण्याचा निर्णय घेतला. या दोघांच्या लग्नसोहळ्यासाठी जवळपास सहाशेहून अधिक पाहुणे मंडळी भारतातून इटलीला जाणार असल्याचेही म्हटले जात होते. पण अचानक साखरपुडा मोडल्यामुळे सर्वांना त्यांची विमानाची तिकीटं रद्द करायला सांगण्यात आली. लग्न ठरण्याआधीच जवळपास दोन वर्षांपासून एकमेकांना डेट करत होते. सूत्रांनी दिलेल्या माहितीनुसार, या दोघांमध्ये हैदराबादच्या विमानतळावर कुठल्या तरी कारणावरुन वाद झाला होता. या वादानंतर दोघांमध्ये दरी वाढत गेली आणि त्यांनी साखरपुडा तोडण्याचा निर्णय घेतला.