झी मराठी वाहिनीवरील 'तुला पाहते रे' या मालिकेने अल्पावधीतच प्रेक्षकांची मनं जिंकली. वय विसरायला लावणाऱ्या या प्रेम कहाणीने टीआरपीच्या यादीतही बाजी मारली आहे. ईशा निमकर आणि विक्रम सरंजामे यांची प्रेमकथा आणि मालिकेत दररोज नव्यानं येणारं वळण प्रेक्षकांना खिळवून ठेवते. आता त्यात 'जब वी मेट' या हिंदी चित्रपटाचंही कनेक्शन पाहायला मिळणार आहे. 'टाइम्स ऑफ इंडिया'ने दिलेल्या वृत्तानुसार, शाहिद कपूर आणि करिना कपूर खान यांच्या 'जब वी मेट' चित्रपटाच्या कथेशी मिळतीजुळती कथा या मालिकेत पाहायला मिळणार आहे. मालिकेच्या आगामी भागात इशा आणि विक्रम अनपेक्षितपणे रोड ट्रीपला जातात आणि ही ट्रीप दोघांसाठी मजेशीर ठरते. या ट्रीपमुळे हे दोघं एकमेकांच्या आणखी जवळ येतात. 'जब वी मेट' चित्रपटात ज्याप्रकारे गीत (करिना) आणि आदित्य (शाहिद) अचानकपणे भेटतात आणि पुढचा प्रवास एकत्र करतात त्याचप्रमाणे 'तुला पाहते रे' मालिकेतील ईशा आणि विक्रम भेटणार आहेत. हे दोघे कसे भेटतात, भेटल्यावर नेमकं काय घडणार हे पाहणं प्रेक्षकांसाठी रंजक ठरेल. मालिकेचा विषयही लोकांना वेगळा वाटतो आहे. वयाने मोठा असलेला विक्रम आणि त्याच्यापेक्षा निम्म्या वयाची ईशा यांची ही प्रेमकथा लोकांना किती पचेल अशी शंका होती. मात्र मालिकेला प्रेक्षकांचा जबरदस्त प्रतिसाद मिळत आहे.
