बॉलिवूडमधली सर्वाधिक लोकप्रिय जोडी दीपिका आणि रणवीर हे दोघंही या आठवड्यात इटलीत विवाहबंधनात अडकणार आहे. नयनरम्य अशा लेक किमो परिसरातील व्हिला दी बाल्बिआनेलो येथे दीप-वीरचा आलिशान विवाहसोहळा रंगणार आहे. या लग्नासाठी व्हिला परिसरात रविवारपासून लगबग सुरू झाली आहे. यापूर्वीही हॉलिवूडमधल्या अनेक बड्या कलाकरांचा विवाहसोहळा येथे पार पडला होता. इटलीत विवाह करणारं दीपिका आणि रणवीर सिंग हे बॉलिवूडमधलं दुसरं जोडपं आहे. सातशे वर्षे जुना असा हा व्हिला लेक किमो परिसरातला सुंदर व्हिला मानला जातो. रोमन शैलीचा प्रभाव इथल्या प्रत्येक गोष्टीवर जाणवतो. जुनं आणि आधुनिकतेचा मेळ साधत लेक किमोच्या किनाऱ्यावर वसलेल्या या व्हिलानं इटलीच्या संपन्न इतिहासाच्या खुणा जपल्या आहेत. त्याचं सौंदर्य दरवर्षी अनेक पर्यटकांना आपल्याकडे आकर्षित करत असतं. खास दीपिका पादुकोन आणि रणवीरच्या लग्नासाठी व्हिला आठवडाभर पर्यटकांसाठी बंद करण्यात आला आहे. १४ आणि १५ नोव्हेंबर रोजी कोंकणी आणि सिंधी पद्धतीनं दिपिका रणवीरचा विवाह इथे पार पडणार आहे. इथे कडक सुरक्षा व्यवस्था करण्यात आली असून मोजक्याच व्यक्तींना इथे प्रवेश देण्यात आल्याचं म्हटलं जात आहे.
