सलमान खानची यंदाची कमाई १३० कोटी रुपये?

सर्वाधिक संख्येने चाहतावर्ग असलेला बॉलिवूडचा सुपरस्टार ‘दबंग’खान ऊर्फ सलमान खानचा यंदा एकही चित्रपट झळकणार नसला तरी त्याची कमाई यंदा १३० कोटी रुपये होणार आहे. सलमान ‘कलर्स’ वाहिनीवरील ‘बिग बॉस’चा सूत्रसंचालक-निवेदक बनल्यानंतर या कार्यक्रमाला प्रचंड प्रेक्षकवर्ग मिळाला. आता सप्टेंबरमध्ये ‘बिग बॉस’चे सातवे पर्व सुरू होण्याची शक्यता असून त्यासाठी नुकताच सलमान करारबद्ध झाल्याचे समजते. ‘बिग बॉस’च्या सातव्या पर्वातील २६ भागांसाठी सलमानने करार केला असून प्रत्येक भागासाठी पाच कोटी रुपये मानधन तो घेणार आहे. यापूर्वी त्याने ‘बिग बॉस’साठी अडीच कोटी रुपये मानधन घेतले होते. विशेष म्हणजे आगामी पर्वात सलमान खान दुहेरी भूमिकेत झळकणार आहे.
रूपेरी पडद्यावरही शाहरूख खान, आमिर खान किंवा अन्य कुणाहीपेक्षा सलमानचा चाहतावर्ग कित्येक पटींनी अधिक आहे. यंदा रमजान ईदला सलमानचा एकही चित्रपट झळकत नसला तरी त्याच्या लोकप्रियतेत घट झालेली नाही. म्हणूनच सलमानला आगामी पर्वातही भरपूर दाम मोजून सूत्रसंचालक म्हणून कायम ठेवण्याचा निर्णय ‘कलर्स’ने घेतला आहे.
‘मेगास्टार’ अमिताभ बच्चन आणि ‘मिस्टर परफेक्शनिस्ट’ आमिर खान यांनाही मानधनाच्या बाबतीत समलानने मागे टाकले आहे. ‘सत्यमेव जयते’ या रिअ‍ॅलिटी शोसाठी आमिर खानने प्रत्येक भागासाठी तीन कोटी रुपये मानधन घेतले होते. तर ‘कौन बनेगा करोडपती’साठी अमिताभने प्रत्येक भागासाठी अडीच कोटी रुपये मानधन घेतले होते.
दरवर्षी ऑक्टोबरमध्ये सुरू होणारे ‘बिग बॉस’चे नवे पर्व यंदा सलमानच्या सांगण्यावरून सप्टेंबरमध्येच सुरू होत आहे. ऑगस्टमध्ये ‘हिट अ‍ॅण्ड रन’ खटल्याची सुनावणी सुरू होणार असून खटला पूर्ण होण्यापूर्वी ‘बिग बॉस’चे चित्रिकरण पूर्ण करता यावे यासाठी सलमान खानने सप्टेंबरमध्ये आगामी पर्व सुरू करण्यास वाहिनीला सांगितल्याचे बोलले जाते. सलमानच्या मानधनावरूनच ‘बिग बॉस’चे आगामी पर्व अधिक भव्य आणि वेगळे ठरेल असा अंदाज व्यक्त केला जात आहे. ‘हेवन अ‍ॅण्ड हेल’ अशी या पर्वाची संकल्पना ठरविण्यात आल्याचे समजते. म्हणूनच सलमान खान परस्परविरोधी दुहेरी भूमिकेत दिसणार असून  त्यामुळेच तो मानधनाची दुप्पट रक्कम घेणार असल्याचे समजते.