ऐरोली, सेक्टर एकमधील शिव कॉलनीमध्ये इमारतीचा पाया खोदत असताना बाजूला असणारी जुनी इमारत ढासळली. सुदैवाने यामध्ये कोणतीही जीवितहानी झाली नाही. याच इमारतीत राहणाऱ्या दोन भाडेकरूंनी दाखवलेल्या प्रसंगावधानाने सर्वाचे प्राण वाचले. रविवारी दुपारी अडीच वाजण्याच्या सुमारास ही घटना घडली. ढासळलेल्या दुमजली इमारतीतील भाडेकरूंना केवळ १५ दिवस अगोदर इमारत सोडण्याचे तोंडी आदेश रूम मालकाने दिले होते. जेसीबीने पाया खोदत असताना अचानक शेजारीत इमारतीच्या भिंती खूप जोरात हादरू लागल्याने प्रसंगावधान राखून दोन्ही खोल्यांतील भाडेकरू अंगावरील कपडय़ांनिशी लहान मुलांना कडेवर घेत जीव मुठीत धरून पळाले.
