कांदिवलीच्या ठाकूर विद्यामंदिरात शनिवारी संध्याकाळी झालेल्या शॉर्टसर्किटमुळे गोंधळ उडाला. यावेळी शाळेच्या वार्षिक स्नेहसंमेलनाचा कार्यक्रम सुरू होता. आगीच्या अफवेने मोठी घबराट निर्माण झाली होती. ठाकूर विद्यामंदिरातील या कार्यक्रमात पालक आणि विद्यार्थी मिळून तीन हजारजण उपस्थित होते. संध्याकाळी सातच्या सुमारास विद्युत रोषणाईच्या ठिकाणी शॉर्टसर्किटमुळे ठिणगी पडली. त्यावेळी झालेल्या मोठय़ा आवाजाने शाळेत एकच घबराट पसरली. अग्निशमन दलाची एक गाडी, पाण्याचा टॅंकर आणि समता नगर पोलीस ठाण्याचे कर्मचारी शाळेत दाखल झाले होते. त्या ठिकाणी केवळ शॉर्ट सर्किट झाल्याचे आढळून आल्याचे अग्निशमन दलाने सांगितले. यावेळी कोणालाही इजा झाली नाही.
