मुंबई : अमलीपदार्थ प्रतिबंधक विभागाने (एएनसी) गोरेगाव येथे रविवारी केलेल्या कारवाई मेफ्रेडॉन (एमडी) या अमलीपदार्थासह परदेशी महिला आणि तिच्या साथीदाराला अटक केली. दोघांकडून सव्वाआठ लाख रुपयांचे अमलीपदार्थ जप्त करण्यात आले. बाबिरे ग्रेस (२८) व अफजल अजमिया सय्यद (४९) अशी अटक आरोपींची नावे आहेत. त्यांच्याकडून ८२ ग्रॅम एमडी जप्त करण्यात आले असून त्याची किंमत आठ लाख २० हजार रुपये असल्याची माहिती पोलिसांनी दिली. बाबिरे ग्रेस ही मूळची युगांडा येथील रहिवासी आहे. सध्या ती नालासोपारा येते वास्तव्याला होती. मुंबईतील उपनगरात एक परदेशी महिला अमलीपदार्थ विक्रीत सक्रिय असल्याची माहिती घाटकोपर एएनसीला मिळाली होती. त्यानुसार प्रभारी पोलीस निरीक्षक लता सुतार यांच्या मार्गदर्शनाखाली रविवारी पोलीस पथकाने गोरेगाव येथील दूधसागर सोसायटी बस थांब्याजवळ सापळा रचला होता. त्यानुसार ग्रेस व सय्यद दोघे एमडी विक्रीसाठी तेथे आले असता त्यांना ताब्यात घेण्यात आले. त्यावेळी ग्रेसकडे ३० ग्रॅम व सय्यदकडे ५२ ग्रॅम एमडी सापडले.