शिवाजी पार्कवर सामूहिक सूर्यनमस्काराचा प्रयोग रंगणार !

शिवाजी पार्कवरील कार्यक्रमात पाच हजार शालेय विद्यार्थी;
मुंबईत एकाच वेळी विविध ४६ ठिकाणी होणार कार्यक्रम
दादर येथील ज्या शिवाजी पार्क मैदानावर राजकीय नेत्यांच्या फड गाजविणाऱ्या सभा, राजकीय पक्षाचे मेळावे झाले, तेथेच येत्या सोमवारी म्हणजे १८ फेब्रुवारी रोजी सामूहिक सूर्यनमस्काराचा कार्यक्रम होणार आहे. या कार्यक्रमात मुंबई शहर आणि उपनगरातल्या २६ शाळांमधील पाच हजार विद्यार्थी सहभागी होणार आहेत. मुंबईचे प्रथम नागरिक अर्थात महापौर सुनील प्रभू हेही या कार्यक्रमात सहभागी होणार असून ते स्वत: सूर्यनमस्कार घालणार आहेत. सकाळी दहा वाजता हा कार्यक्रम होणार आहे.
निमित्त आहे ते स्वामी विवेकानंद यांच्या शतकोत्तर सुवर्णमहोत्सवी जयंती वर्षांचे. स्वामी विवेकानंद सार्थ शती समारोह समितीतर्फे या कार्यक्रमाचे आयोजन करण्यात आले आहे. स्वामी विवेकानंद यांनी भारतात आणि विदेशातही भारतीय संस्कृतीचा प्रसार केला. तसेच विद्यार्थी आणि तरुणांना त्यांनी बलोपासनेचाही उपदेश केला होता. रविवार, १७ फेब्रुवारी रोजी रथसप्तमी असून त्यानिमित्ताने सोमवारी मुंबईत सामूहिक सूर्यनमस्कारांचा हा कार्यक्रम आयोजित करण्यात आला आहे.
शिवाजी पार्क येथे होणाऱ्या कार्यक्रमास ज्योतिर्भास्कर जयंतराव साळगावकर, अभिनेते नाना पाटेकर आणि अन्य मान्यवर उपस्थित राहणार आहेत.
मुंबईत १८ तारखेला विविध ४६ ठिकाणी सामूहिक सूर्यनमस्काराचे कार्यक्रम होणार असून त्यात सुमारे एक लाख विद्यार्थी सहभागी होणार आहेत. मुंबईत गिरगाव, लालबाग, माटुंगा, सांताक्रूझ, विलेपार्ले, कुर्ला आणि इतर ठिकाणी सामूहिक सूर्यनमस्काराचे कार्यक्रम होणार आहेत.
स्वामी विवेकानंद सार्थ शती समारोह समितीच्या महाराष्ट्र शाखेच्या अध्यक्षपदी गजाननमहाराज न्यासाचे विश्वस्त शिवशंकर पाटील असून सोमवार, १८ फेब्रुवारी रोजी संपूर्ण महाराष्ट्रात अनेक जिल्ह्यांत विविध ठिकाणी सामूहिक सूर्यनमस्काराचे कार्यक्रम आयोजित करण्यात आले आहेत.