मुंबई: फिलिपिन्समध्ये अटक करण्यात आलेला कुख्यात गुंड सुरेश पुजारीविरोधात मुंबईत खंडणीचा गुन्हा दाखल करण्यात आला असून पुजारीने ५० लाख रुपयांची खंडणी मागितल्याची तक्रार सांताक्रुझ येथील हॉटेल व्यवसायिकाने मुंबई पोलिसांकडे केली होती. पुढील तपासासाठी हे प्रकरण गुन्हे शाखेकडे वर्ग करण्यात आल्याची माहिती वरीष्ठ सूत्रांनी दिली. ५१ वर्षीय तक्रारदार ओशिवरा येथील जॉगर्स पार्क परिसरातील लोखंडवाला बॅक रोड येथील रहिवासी आहे. सांताक्रुझ पश्चिम येथे त्यांचा रेस्टॉरन्ट व बार आहे. मार्च महिन्यात पुजारीने तक्रारदार व्यावसायिकाकडे धमकावून ५० लाख रुपयांची मागणी केली होती. अन्यथा मारून टाकण्याची धमकी दिली होती. जीवाच्या भीतीने व्यावसायिकाने हा प्रकार कोणालाही सांगितला नाही. मात्र १५ ऑक्टोबरला सुरेश पुजारीला फिलिपिन्समध्ये स्थानिक गु्प्तहेर विभागाने अटक केल्याची बातमी प्रसिद्धी माध्यमांवर पाहिल्यानंतर पुजारीने आपल्यालाही ५० लाखांची खंडणीसाठी धमकावल्याची तक्रार केली.
