नागरिकांना बळीचे बकरे बनवू नका – उद्धव ठाकरे

आपल्याला नागरी सुविधा मिळतील या विचारातून नागरिकांनी आपणास निवडून दिलेले असते. त्यामुळे असुविधा निर्माण करून जनतेला बळीचे बकरे बनवू नका. प्रशासन आणि लोकप्रतिनिधींमध्ये असहकार्याचे वातावरण असेल तर त्याचा सर्वाधिक त्रास नागरिकांना होतो याचे भान या दोन्ही यंत्रणांनी ठेवणे आवश्यक आहे, असे प्रतिपादन शिवसेनेचे पक्षप्रमुख उद्धव ठाकरे यांनी रविवारी येथे केले.
कल्याणमधील दुर्गामाता चौक येथे शिवसेनेच्या पालिकेतील सत्तेने १९९६मध्ये शिवरायांचा अश्वारूढ पुतळा उभारण्याचा निर्णय घेतला होता. सोळा वर्षांनंतर उभारण्यात आलेल्या या पुतळ्याच्या अनावरण कार्यक्रमात उद्धव ठाकरे बोलत होते. या वेळी शिवसेनेचे नेते मनोहर जोशी, उपसभापती वसंत डावखरे व इतर मान्यवर उपस्थित होते.
पालिकेतील सर्व पक्षांच्या संमतीने पुतळा उभारणीचा निर्णय झाल्याने या कार्यक्रमात ठाकरे यांनी राजकीय विषयावर भाष्य करण्याचे टाळले. जनतेची प्रत्येक गरज ओळखून शिवरायांनी राज्यकारभार केला म्हणून त्यांनी रयतेचे राज्य निर्माण केले. गद्दारी करणाऱ्यांना क्षमा केली नाही. आता धरणातून पाणी सोडायचे की नाही, जनतेला आवश्यक असणाऱ्या भाजीचे मूळ, देठाचे काय याचा कोठेही राज्यकर्त्यांकडून विचार होताना दिसत नाही. गरीब जनतेला उखडून टाकण्याचे काम सुरू आहे, अशी टीका राज्य सरकारचा नामोल्लख टाळून ठाकरे यांनी केली.
पुतळ्यासाठी ठाण्याचा आधार
कल्याण-डोंबिवली पालिकेत शिवसेनेची चौदा वर्षे सत्ता असताना एक अत्याधुनिक अग्निशमन दलाची गाडी प्रशासन खरेदी करू शकले नाही. त्यामुळे शिवरायांच्या अश्वारूढ पुतळ्याला हार घालण्यासाठी ठाणे पालिकेची अत्याधुनिक अग्निशमन दलाची गाडी लाख रुपये भरणा करून कार्यक्रमस्थळी आणण्यात आली होती. विकासाची टिमकी वाजविणाऱ्या महापौर, आयुक्तांना याचे भान नसल्याचे दिसून येत होते.