मुंबईत एका जीएसटी अधीक्षकाने कफ परेड येथील वर्ल्ड ट्रेड सेंटर या इमारतीच्या ३० व्या मजल्यावरुन उडी घेऊन आत्महत्या केल्याने खळबळ उडाली आहे. सोमवारी संध्याकाळी ही घटना घडली. पोलिसांनी याप्रकरणी अपघाती मृत्यू अशी नोंद केली असून पुढील तपास सुरु करण्यात आला आहे. पोलिसांच्या माहितीनुसार, हरिंदर कपाडिया (वय ५१) असे आत्महत्या केलेल्या व्यक्तीचे नाव आहे. त्यांनी इमारतीवरुन उडी घेतल्यानंतर स्थानिक लोक तत्काळ घटनास्थळी गोळा झाले. त्यानंतर कपाडिया यांना जवळच्या रुग्णालयात दाखल करण्यात आले. मात्र, डॉक्टरांनी त्यांना उपचारांपूर्वीच मृत घोषीत केले. या घटनेमागील कारण अद्याप स्पष्ट झालेले नाही, पोलीस अधिक तपास करीत आहेत.
