हँकॉक पुलाचे बांधकाम वादात

पालिका आणि रेल्वेही म्हणते, पूल आम्हीच बांधणार; रहिवाशांचे मात्र हाल
एखाद्या कामाच्या उभारणीसाठी हजारो हात एकत्र येतात, हे नवीन नाही. मात्र मुंबईच्या उपनगरीय रेल्वेमार्गावरील १३५ वष्रे जुना पूल पाडण्यासाठी एकत्र आलेले हात पुलाच्या बांधकामावेळी एकमेकांविरोधात उठले आहेत. हँकॉक पूल बांधण्याबाबत रेल्वे आणि पालिका यांच्यात सुरू असलेल्या वादामुळे हा पूल बांधण्याचे काम आणखी लांबणीवर पडत आहे. पालिकेने काढलेल्या निविदेनुसार हँकॉक पूल बांधण्यासाठी ५० कोटी रुपयांचा खर्च येणार आहे. पूल बांधण्यासाठी १५ महिन्यांचा कालावधी लागणार असल्याचे पालिकेतील मुख्य अभियंता सांगतात. तरीही पूल बांधणे हे रेल्वेचे काम नसून ते आम्हीच करणार, असा पवित्रा पालिकेने घेतला आहे. या वादात रहिवाशांचे मात्र हाल होत आहे.
मध्य रेल्वेवर डीसी-एसी परिवर्तन झाल्यानंतर ओव्हरहेड वायर आणि हँकॉक पुलाच्या खालचा भाग यांच्यात खूपच कमी अंतर राहत होते. तसेच हा पूल जुना झाल्याने तो पाडणे आवश्यक होते. नोव्हेंबर २०१५पासून वाहतुकीसाठी बंद करण्यात आलेला हा पूल अखेर विशेष ब्लॉक घेऊन जानेवारी २०१६मध्ये पाडला. मात्र त्या जागी पादचाऱ्यांसाठी पूल बांधण्याची तसदी पालिका अथवा रेल्वे यांनी घेतली नाही. पूल पडून चार महिने झाले असून या चार महिन्यांत पुलाखालून रेल्वे रूळ ओलांडताना अनेक बळी गेले आहेत.
आता रेल्वे आणि पालिका कारनॅक पूल पाडण्याचे नियोजन करीत आहे. त्याआधी हँकॉक पुलाजवळ पूल उभारणे गरजेचे आहे. त्यासाठी रेल्वेने लष्कराच्या पूल अभियांत्रिकी विभागाचा पर्यायही दिला आहे. रेल्वेच्या मते रेल्वे हद्दीतील पूल बांधणे ही रेल्वेची जबाबदारी आहे. हँकॉक पूल पूर्णपणे रेल्वेमार्गावर बांधलेला पूल असल्याने तो बांधण्याची जबाबदारी रेल्वेची आहे, असे रेल्वेच्या एका वरिष्ठ अधिकाऱ्याने सूचित केले. मात्र पालिकेच्या मते पूल बांधणे, हे पालिकेचे काम असून त्यात रेल्वेने ढवळाढवळ करण्याची गरज नाही. पालिकेच्या पूल बांधणी विभागाचे मुख्य अभियंता ओ. कोरी यांनी दिलेल्या माहितीनुसार हा पूल बांधण्यासाठी ५० कोटी रुपये खर्च असून तो १५ महिन्यांत पूर्ण होणार आहे. मात्र त्याची निविदा प्रक्रिया अद्यापही चालू आहे, असेही कोरी यांनी स्पष्ट केले. मात्र, पूल बांधणे हे काम पालिकेचे असेल, तर हँकॉक पूल पाडण्यापूर्वी पालिकेनेच रहिवाशांसाठी पर्यायी पूल उभारायला हवा होता, असा युक्तिवाद रेल्वे अधिकारी करीत आहेत. त्यामुळे पूल पाडताना एकमेकांच्या हातात हात घालणाऱ्या दोन संस्था पूल बांधण्याच्या वेळी मात्र हमरीतुमरीवर आल्याचे दिसत आहे.

महापालिका काय म्हणते..
पालिकेच्या मते पूल बांधणे, हे पालिकेचे काम असून त्यात रेल्वेने ढवळाढवळ करण्याची गरज नाही. हा पूल बांधण्यासाठी ५० कोटी रुपये खर्च असून तो १५ महिन्यांत पूर्ण होणार आहे. मात्र त्याची निविदा प्रक्रिया अद्यापही चालू आहे. तसेच रेल्वेमार्गावरील पूल पाडण्याचे काम रेल्वे प्रशासनाचे आहे. हँकॉक येथील पूल पाडण्याआधी रेल्वे प्रशासनाने पादचाऱ्यांसाठी पर्यायी पूल बांधणे गरजेचे होते.
रेल्वे काय म्हणते..
हँकॉक पूल पूर्णपणे रेल्वेमार्गावर बांधलेला पूल असल्याने तो बांधण्याची जबाबदारी रेल्वेची आहे. पूल बांधणे हे काम पालिकेचे असेल, तर हँकॉक पूल पाडण्यापूर्वी पालिकेनेच रहिवाशांसाठी पर्यायी पूल उभारायला हवा होता.