वृद्धांसाठी नव्या वर्षांत आरोग्यदायी ‘उत्तररंग’!

* अंबेजोगाई येथे २०० खाटांचे रुग्णालय
* जिल्हा रुग्णालयांमध्ये ३० खाटांची व्यवस्था
* प्राथमिक आरोग्य केंद्रात बाह्यरुग्ण विभाग
* खास वृद्धांसाठी रुग्णवाहिकेची व्यवस्था
आगामी वर्षांत राज्यातील दीड कोटींहून अधिक वृद्धांच्या आरोग्याची काळजी घेण्याचा मनपूर्वक संकल्प आरोग्य विभागाने सोडला आहे. अंबेजोगाई येथे वृद्धांसाठी २०० खाटांचे सुसज्ज रुग्णालय आणि राज्यातील २३ जिल्हा रुग्णालयांमध्ये वृद्धांसाठी तीस खाटांची व आवश्यक वैद्यकीय सुविधांची व्यवस्था करण्यात येणार आहेच, त्याशिवाय, ग्रामीण तसेच आदिवासी भागातील आजारी वृद्धांना रुग्णालयात घेऊन जाण्यासाठी रुग्णवाहिका उपलब्ध करून देण्याबरोबरच प्राथमिक आरोग्य केंद्रांमध्येही आठवडय़ातून दोन दिवस वृद्धांसाठी ‘ओपीडी’ सुरु केली जाणार आहे.
राज्यातील वृद्धांच्या आरोग्याची समस्या दिवसेंदिवस उग्र होत असून मधुमेह, उच्च रक्तदाब, हृदयविकार तसेच कॅन्सरग्रस्त वृद्ध रुग्णांना वेळेत व प्रभावी उपचार मिळावे यासाठी नवीन वर्षांत आरोग्य विभागाने अनेक योजना आखल्या आहेत. मधुमेह व उच्च रक्तदाबाला अटकाव करण्यासाठी प्रतिबंधात्मक उपचार तसेच पुनर्वसनाच्या सेवा उपलब्ध करून देण्यात येणार असल्याचे आरोग्य विभागाचे अतिरिक्त मुख्य सचिव टी. सी. बेंजामिन यांनी सांगितले. यासाठी ‘राष्ट्रीय आरोग्य ग्रामीण अभियान’ योजनेचा प्रभावीपणे वापर करण्यात येणार असून केवळ वृद्धांसाठी अंबेजोगाई येथे सुरु करण्यात येणारे हे पहिलेच शासकीय रुग्णालय असेल असेही बेंजामिन यांनी सांगितले. या रुग्णालयात वृद्धांच्या आरोग्याचा विचार करून सर्व अत्याधुनिक सेवा उपलब्ध करून देण्यात येणार असून जिल्हा व विभागीय रुग्णालयांच्या ठिकाणी वैद्यकीय सेवा सुरु करण्यात येणार असल्याचे राज्याच्या आरोग्य संचालिका डॉ. अर्चना पाटील यांनी सांगितले. साठीच्या पुढील वृद्धांच्या आरोग्याचे अनेक प्रश्न आहेत. यात मानसिक आजार ही वाढती समस्या असून त्यादृष्टीनेही विशेष काळजी घेण्यात येणार आहे. सध्या भायखळा येथील जे.जे. रुग्णालयात विभागीय वृद्ध उपचार व्यवस्था सुरु करण्यात आली असून ‘ग्रॅज्युएट इन जेरियाट्रिक मेडिसिन’ असा स्वतंत्र विषय वृद्धांच्या आरोग्याचा विचार करून सुरु करण्यासाठी केंद्राकडे पाठपुरावा करण्यात येणार आहे. विदर्भातील सहा जिल्ह्य़ांमध्ये वृद्धांच्या आरोग्यासाठी विशेष योजना सुरु करण्यास मान्यता देण्यात आली असली तरी आगामी वर्षांत संपूर्ण राज्यातील जिल्हा रुग्णालयांमध्ये वृद्धांच्या आरोग्यासाठी स्वतंत्र व्यवस्था करण्यात येणार असल्याचे बेंजामिन यांनी सांगितले.