लोकसत्ता प्रतिनिधी मुंबई : महानगरपालिकेच्या २०२४ - २५ च्या अर्थसंकल्पात वीरमाता जिजाबाई भोसले उद्यान व प्राणिसंग्रहालयातील आधुनिकीकरणाच्या कामासाठी तब्बल ७४.३० कोटींची तरतूद करण्यात आली आहे. सन २०२३ - २४ या वर्षासाठी केवळ २३.५२ कोटींची रक्कम प्रास्ताविण्यात आली होती. आर्थिक वर्ष २०२४ - २५ मध्ये पेंग्विन कक्षासमोर अॅक्वा गॅलरी आणि परिसरातील अंतर्गत रस्त्यांची कामे हाती घेण्यात येणार आहेत. तसेच, आगामी वर्षात जुन्या रोपवाटिका जागेवर थीम आधारित नवीन उद्यान व विस्तारित भूखंडावर एक नवीन रोपवाटिका संकुल कार्यान्वित करण्यात येणार आहे.