मुंबईतील कुर्ला टर्मिनल स्थानकाच्या फलाट क्रमांक दोन आणि तीनच्या दरम्यान एक अज्ञात इसम पोलिसांच्या हातात दोन बॅगा ठेवून फरार झाला आहे. त्यामुळे पोलिसांनी अज्ञात व्यक्तीच्या विरोधात गुन्हा दाखल केला आहे.शनिवारी एक इसम रेल्वे स्थानकावर संशयास्पद अवस्थेत आढळल्यानंतर रेल्वे पोलिसांनी बॅगमध्ये काय आहे, अशी विचारणा केली असता बॅगेला कुलूप असल्याचे कारण त्या इसमाने दिले. त्यानंतर पोलिसांनी कुलूप खोलण्यास सांगितल्यानंतर चावी भावाजवळ आहे ती घेऊन येतो, असे सांगून गेलेला इसम परत आलाच नाही. त्यामुळे पोलिसांनी त्या दोन्ही बॅगा पोलीसठाण्यात आणून उघडल्यानंतर त्यामध्ये मोबाईल, रोख एक लाख रुपये सापडले.या दोन्ही बॅगांमधील मुद्देमाल दीड लाख रुपयांच्या घरात असल्याचे पोलिसांनी सांगितले. याबाबत कुर्ला पोलीस ठाण्यात अज्ञात व्यक्तीच्या विरोधात गुन्हा दाखल करण्यात आला असून पोलीस अधिक तपास करीत आहेत.
