ठाकरे गटाचे खासदार संजय राऊत यांनी आज कोल्हापुरात एक आक्षेपार्ह विधान केलं आहे. राज्यातील विधीमंडळ हे चोरमंडळ आहे, अशा आशयाचं विधान संजय राऊतांनी केलं. राऊतांच्या या विधानानंतर विधानसभेच्या अर्थसंकल्पीय अधिवेशनात एकच गदारोळ झाला. भारतीय जनता पार्टीच्या सदस्यांनी संजय राऊतांवर हक्कभंगाचा प्रस्ताव आणला. यानंतर विधानसभा अध्यक्षांनी विधिमंडळाचं आजचं कामकाज तहकूब केलं. सभागृहातील कामकाज तहकूब केल्यानंतर भाजपा आणि शिंदे गटाच्या सदस्यांनी विधानभवन परिसरात जोरदार घोषणाबाजी केली. दरम्यान, शिंदे गटाचे आमदार संतोष बांगर यांनी संजय राऊतांचा एकेरी उल्लेख करत आणि थेट शिवी देत संतप्त प्रतिक्रिया दिली. संजय राऊत हा डाकू आहे, त्याच्यावर ३९५ कलमांतर्गत गुन्हा दाखल करावा, अशी मागणी संतोष बांगर यांनी केली. हेही वाचा- “जनतेचा अवमान करण्याचा अधिकार कुणालाच नाही”, राऊतांच्या ‘त्या’ विधानावर नाना पटोलेंची प्रतिक्रिया संजय राऊतांच्या विधानाबाबत विचारलं असता संतोष बांगर म्हणाले, "संजय राऊत आमच्या मतांवर निवडून येतो आणि आम्हालाच चोर म्हणत आहे. मला वाटतं, हा संजय राऊत डाकू आहे डाकू… त्याच्यावर ३९५ कलमांतर्गत गुन्हा दाखल करावा." अशी प्रतिक्रिया दिल्यानंतर संतोष बांगर यांनी गलिच्छ भाषेत संजय राऊतांना शिवीगाळ केली. हेही वाचा- VIDEO: “तुम्ही गद्दार आहात, एका डाकूबरोबर…”, बच्चू कडूंची गाडी आडवून वयोवृद्धाने झापलं "संजय राऊत आम्हाला ज्या पद्धतीने चोर म्हणत आहेत, मग उद्धव ठाकरे आणि आदित्य ठाकरे यांनाही त्यांनी चोर म्हटलं आहे. अशा हरा**** महाराष्ट्रातील जनता फिरू देणार नाही," असंही संतोष बांगर पुढे म्हणाले.
