आगामी नाटय़ संमेलन ठाण्यात

नाटय़ परिषदेची माहिती; पहिले ‘बालनाटय़ संमेलन’ सोलापुरात
९६वे अखिल भारतीय मराठी नाटय़संमेलन पुढील वर्षी फेब्रुवारीमध्ये ठाण्यात होत असल्याची माहिती नाटय़ परिषदेचे अध्यक्ष मोहन जोशी यांनी सोमवारी दिली. तर पहिले अखिल भारतीय बालनाटय़ संमेलन २६ ते २९ नोव्हेंबर या कालावधीत सोलापूर येथे होत असल्याचे नाटय़ परिषदेचे प्रमुख कार्यवाह दीपक करंजीकर यांनी सांगितले.
पुढील वर्षी फेब्रुवारी महिन्याच्या तिसऱ्या किंवा चौथ्या आठवडय़ात ते होणार असल्याचेही जोशी म्हणाले. या पत्रकार परिषदेस नाटय़ परिषदेचे कोषाध्यक्षा लता नार्वेकर, बालनाटय़ संमेलनाच्या निमंत्रक समितीचे प्रमुख भाऊसाहेब भोईर उपस्थित होते. मुलांमधील सुप्त कलागुणांना वाव आणि व्यासपीठ मिळावे, बालनाटय़ विषयाशी संबंधित विविध विषयांवर चर्चा व्हावी या उद्देशाने हे बालनाटय़ संमेलन आयोजित करण्यात आले आहे. या चार दिवसांच्या संमेलनात पहिले दोन दिवस सोलापूर येथील स्थानिक कलावंताचे सांस्कृतिक कार्यक्रम होणार आहे.
करंजीकर म्हणाले, संमेलनाचा मुख्य उद्घाटन सोहळा २८ नोव्हेंबर रोजी सकाळी १० वाजता होणार आहे. बालनाटय़ चळवळ आणि मतिमंद मुलांसाठी नाटय़ प्रशिक्षण उपक्रम राबविणाऱ्या कांचन सोनटक्के या संमेलानाध्यक्षा असून आमदार प्रणिती शिंदे स्वागताध्यक्षा आहेत. उद्घाटन सोहळ्यास माजी केंद्रीय गृहमंत्री सुशीलकुमार शिंदे प्रमुख पाहुणे, उद्घाटक म्हणून राज्याचे सांस्कृतिक कार्यमंत्री विनोद तावडे तर अखिल भारतीय मराठी नाटय़संमेलनाच्या अध्यक्षा व फैय्याज अध्यक्ष म्हणून उपस्थित राहणार आहेत.