धावत्या लोकलमध्ये सुदेवी रामलाल पाल (३२) ही महिला मंगळवारी दुपारी साडेतीन वाजता प्रसूत झाली. प्रसूतीसाठी ती पतीसोबत केईएम रुग्णालयात जाण्यासाठी कल्याणहून निघाली होती. विक्रोळी स्थानक येताच तिला प्रसूतिवेदना सुरू झाल्या आणि तिने डब्यातच बाळाला जन्म दिला. दरम्यान, गस्तीवरील रेल्वे पोलिसांना आणि स्टेशन मास्तरांना याची महिती मिळताच त्यांनी रुग्णवाहिका मागवली आणि सुदेवीला रुग्णालयात दाखल केले. सुदेवी आणि तिच्या बाळाची प्रकृती चांगली आहे.