नागपूर : निवृत्ती वेतनाकरिता ना हकरत प्रमाणपत्र देण्यासाठी निवृत्त शिक्षकाकडून २० हजार ५०० रुपयांची लाच स्वीकारणाऱ्या मुख्याध्यापक व वरिष्ठ लिपिकाला लाचलुचपत प्रतिबंधक विभागाने (एसीबी) सोमवारी रंगेहाथ पकडले. मुख्याध्यापक अनिल रामधन सगणे (५७) व वरिष्ठ लिपिक प्रशांत वामनराव कुरळकर (५२),अशी अटकेतील लाचखोरांची नावे आहेत. ऑगस्ट २०२०मध्ये तक्रारदार हे सहाय्यक शिक्षक पदावरून निवृत्त झाले. निवृत्तीच्या सहा महिन्यांपूर्वी शिक्षकाच्या निवृत्त वेतनाचा प्रस्ताव जिल्हा परिषदेच्या शिक्षणाधिकाऱ्यांना (माध्यमिक) पाठवणे नियमानुसार बंधनकारक होते. परंतु तक्रारदाराचा प्रस्ताव मुख्याध्यापक व लिपिकाने पाठवला नाही. तक्रारदाराने मुख्याध्यापकाची भेट घेतली. मुख्याध्यापकाने लिपिकाला भेटायला सांगितले. लपिक कुरळकर यांना भेटले. त्यांनी शाळेच्या ना हरकत प्रमाणपत्रासह काही विवरणपत्रात काही राहिलेले मुद्दे भरून ते कोषागार कार्यालयात जमा करण्यास सांगितले. निवृत्त शिक्षकाने विवरण पत्र भरले. नाहकरत प्रमाणपत्र देण्यासाठी मुख्याध्यापक व लिपिकाने त्याला शाळेच्या देखभालीच्या नावाखाली २० हजार ५०० रुपये मागितले. तक्रारदाराने लाचलुचपत प्रतिबंधक विभागाकडे तक्रार केली. अधीक्षक रश्मी नांदेडकर, अतिरिक्त अधीक्षक मिलिंद तोतरे यांच्या मार्गदर्शनाखाली कारवाई झाली.