मुक्त विद्यापीठाच्या सेवेत कायम करण्यासाठी आमरण उपोषणाचा इशारा

यशवंतराव चव्हाण महाराष्ट्र मुक्त विद्यापीठात सहा ते सात वर्षांपासून करार पद्धतीने कार्यरत सहायक पदावरील १७ कर्मचाऱ्यांना शासन निर्देशानुसार कायमस्वरूपी सेवेत सामावून घेण्यास टाळाटाळ केली जात असल्याच्या निषेधार्थ २८ मार्चपासून अन्यायग्रस्त कर्मचाऱ्यांनी आमरण उपोषणाचा इशारा दिला आहे.
मुक्त विद्यापीठात विहित प्रक्रियेचा अवलंब करून सहायक पदावर १७ कर्मचारी सहा ते सात वर्षांपासून करार पद्धतीने काम करत आहेत. विद्यापीठाच्या मागणी व प्रस्तावानुसार २४ फेब्रुवारी २०१४ रोजी या कर्मचाऱ्यांना विद्यापीठ सेवेत सामावून घेण्याबाबत शासन निर्णय झाला. तत्कालीन कुलगुरू डॉ. कृष्णकुमार यांचे आकस्मिक निधन झाल्यानंतर मुक्त विद्यापीठाचा प्रभारी कार्यभार आरोग्य विज्ञान विद्यापीठाचे कुलगुरू डॉ. अरुण जामकर यांच्याकडे आला; परंतु या शासन निर्णयाची अंमलबजावणी प्रभारी कार्यभार असल्याने त्यांना करता आली नाही. त्यानंतर डॉ. माणिकराव साळुंखे यांची कुलगुरूपदी नियुक्ती झाली. या नियुक्तीनंतर आम्ही वेळोवेळी अर्ज करून विद्यापीठात कायमस्वरूपी कामकाजात सामावून घेण्याची विनंती केली. स्थानिक लोकप्रतिनिधी तसेच विविध संघटनांचे पदाधिकारी यांनीदेखील कुलगुरूंशी चर्चा करून शासनाच्या निर्णयानुसार अन्यायग्रस्त कर्मचाऱ्यांना सेवेत सामावून घेण्याची सूचना केली. मात्र आजतागायत त्याची अंमलबजावणी झाली नाही. उच्च व तंत्र शिक्षण विभागाचा आदेश विद्यापीठाने झुगारला. वस्तुस्थितीकडे कानाडोळा करत केवळ भविष्यात स्वतंत्र भरती करून स्वार्थ साधण्यासाठी आमच्यावर अन्याय केला जात असल्याची भावना कर्मचाऱ्यांनी व्यक्त केली. मुक्त विद्यापीठाच्या हुकूमशाही धोरणाविरोधात २८ मार्चपासून उपोषण केले जाणार आहे. कायमस्वरूपी सेवेत सामावून घेण्याबाबत कुलगुरू आदेश देत नाहीत, तोपर्यंत आमरण उपोषण केले जाईल, असे कर्मचाऱ्यांनी म्हटले आहे.