पुण्यातील औंध परिसरात आईच्या हातातून दहा दिवसांचे बाळ हिसकावून नेल्याची धक्कादायक घटना घडली. दापोडीतील महिला तिच्या दहा दिवसांच्या बाळाला खासगी रुग्णालयात उपचारासाठी घेऊन आली होती. उपचारानंतर घरी परतत असताना हा प्रकार घडला. याप्रकरणी खडकी पोलिसांत तक्रार दाखल करण्यात आली असून पोलीस पुढील तपास करत आहेत. पोलिसांनी दिलेल्या माहितीनुसार, रेश्मा खान (वय २६ रा. दापोडी) या महिलेसोबत हा प्रकार घडला. बुधवारी सकाळी साडे अकराच्या सुमारास रेश्मा तिच्या १० महिन्यांच्या बाळाला उपचारासाठी खासगी रुग्णालयात घेऊन आली होती. दुपारी १२ वाजता रुग्णालयातून बाहेर आल्यानतंर घरी जाण्यासाठी ती एका रिक्षामध्ये बसली. रेश्मा खान ज्या रिक्षात बसली त्याच रिक्षात पूर्वीपासूनच एक महिला बसली होती. रिक्षा काही अंतरावर गेल्यानंतर रिक्षात बसलेल्या त्या अज्ञात महिलेने रेश्माला धक्का देत तिच्या मांडीवरुन बाळाला हिसकावून घेऊन पळ काढला. या घटनेचा रेश्माला चांगलाच धक्का बसला आहे. घटनेची माहिती मिळताच पोलीस घटनास्थळी दाखल झाले. पोलीस सीसीटीव्ही फुटेजच्या सहाय्याने बाळाला पळवून नेणाऱ्या अज्ञात महिलेचा शोध घेण्याचा प्रयत्न करत आहेत.
