पुण्यात वडगाव धायरी येथील नवले पुलाजवळ ट्रकने आठ वाहनांना धडक देऊन १२ जणांना जखमी केल्याची घटना ताजी असताना सायंकाळी साडे सहाच्या सुमारास कोथरूडमध्ये देखील असाच अपघात घडला. कोथरुडमधील आशीष गार्डनजवळ एका भरधाव टेम्पोने आठ गाड्यांना उडवण्याची घटना घडली. याप्रकरणी ट्रक चालकास पोलिसांनी ताब्यात घेतले आहे. या घटनेबाबत माहिती देताना कोथरूड पोलीस ठाण्याचे पोलीस निरीक्षक अप्पा शेवाळे म्हणाले, आशीष गार्डनजवळ एका टेम्पोने साडे सहाच्या सुमारास दुचाकी, चारचाकी, रिक्षा अशा एकूण आठ वाहनांना धडक दिली. या अपघातामुळे संबंधीत वाहनांचे मोठ्या प्रमाणावर नुकसान झाले आहे. दरम्यान, घटनास्थळावरील नागरिकांनी संबंधीत टेम्पो चालकाला चोप देत पोलिसांच्या हवाली केले.
