दोन आरोपींना अटक पुणे : ल्हासाअ‍ॅप्सो जातीचा तब्बल पावणे तीन लाख रुपये किमत असलेला पाळीव श्वान चोरून नेल्याप्रकरणी दोघांना भारती विद्यापीठ पोलिसांनी अटक केली आहे. मंगळवारी (२८ जावेवारी) ही चोरी झाली होती. अमोल मारुती चव्हाण (वय ३५, रा. अपर इंदिरानगर), निरंजन आनंद कुलकर्णी (वय ३४, रा. रक्षलिका सोसायटी, धनकवडी) अशी अटक केलेल्या आरोपींची नावे आहेत. या प्रकरणी सचिन अ‍ॅन्थोनी (वय ३६, रा. निंबाळकरवाडी, कात्रज) यांनी फिर्याद दिली आहे. पोलिसांनी दिलेल्या माहितीनुसार, अ‍ॅन्थोनी हे पाळीव श्वानांचे प्रशिक्षक आहेत. गुजर निंबाळकरवाडी येथील एका फार्महाऊससमोरील मोकळ्या जागेत ते श्वानांना प्रशिक्षण देतात. या ठिकाणाहून अ‍ॅन्थोनी यांच्या ओळखीच्या असलेल्या दोघांनी संबंधित श्वान चोरून नेल्याची फिर्याद देण्यात आली. त्यावरून दोघांना अटक करण्यात आली असून, पुढील तपास करण्यात येत आहे.
