पुण्यातील गणेश पेठ येथे एका तरूणाने किरकोळ कारणावरून झालेल्या भांडणात आपल्या होणार्‍या पत्नीवर आणि तिच्या आईवर चाकूने वार केल्याची घटना घडली आहे. या घटनेत तरुणीचा मृत्यू झाला. तर तिची आई गंभीर जखमी असल्याची माहिती फरासखाना पोलिसांनी दिली. नाझनीन सादिक शेख या तरुणीचा या घटनेत मृत्यू झाला आहे. तर तिच्या आई हमीदा सादिक शेख या गंभीर जखमी झाल्या आहेत. दरम्यान, या घटनेतील आरोपी शरीफ रझाक शेख याला अटक करण्यात आली आहे. पोलिसानी दिलेल्या माहितीनुसार, गणेश पेठ परिसरात हमीदा सादिक शेख या त्यांच्या कुटुंबीयांसोबत वास्तव्यास आहेत. नाझनीन या त्यांच्या मुलीचा शरीफ शेख या तरुणासोबत विवाह होणार होता. मात्र, मंगळवारी दुपारच्या सुमारास त्यांच्यात अचानक वाद झाला. या दरम्यान शरीफ शेख याने नाझनीन आणि हमीदा यांच्यावर चाकूने वार केले. या हल्ल्यात नाझनीन हिचा मृत्यू झाला. तर तिच्या आई हमीदा यांना रूग्णालयात दाखल करण्यात आले असून त्यांची प्रकृती चिंताजनक आहे. या दोघींवर हल्ला करणार्‍या आरोपी शरीफ याला अटक करण्यात आल्याचे सांगण्यात आले.
