सराईत गुन्हेगाराचा खून झाल्याची घटना देहूगावमध्ये घडली आहे. संध्याकाळी सातच्या सुमारास तीन ते चार जणांच्या अज्ञात टोळक्याने सराईत गुन्हेगार शंकर दत्तात्रय बाळसराफ याच्यावर कोयत्याने वार केले यात त्याचा मृत्यू झाला आहे. हल्लेखोर पसार झाले असून त्यांचा शोध पोलीस घेत आहेत. पूर्ववैमनस्यातून खून झाल्याचे पोलिसांकडून सांगण्यात येत आहे. घटनेचा अधिक तपास देहूरोड पोलीस करत आहेत. पोलिसांनी दिलेल्या माहितीनुसार, मृत शंकर हा नुकताच कारागृहातून सुटून आलेला गुन्हेगार आहे. त्याने एकाला गंभीर जखमी केले होते. त्यामध्ये त्याला कारागृहात जावे लागले होते. आज संध्याकाळी तो देहूगावमध्ये आला होता. त्यावेळी त्याच्यावर अज्ञात तीन ते चार जणांच्या टोळक्याने त्याच्यावर कोयत्याने सपासप वार केले यात त्याचा जागीच मृत्यू झाला. दरम्यान, या घटनेमुळे राज्यातून दाखल झालेले वारकरी मात्र भीतीच्या सावटाखाली आहेत. या घटनेमुळे गावकऱ्यांमध्ये भीतीचे वातावरण आहे. हा खून पूर्ववैमनस्यातून झाल्याचे देहूरोड पोलिसांनी सांगितले आहे. घटनेचा अधिक तपास सुरु असून आरोपीचा शोध घेतला जात आहे.
