शिवीगाळ करून डुक्कराचं मांस खाण्यासाठी जबरदस्ती करून एका विवाहित महिलेला तिच्या सासरच्या मंडळींनी जीवे मारण्याची धमकी दिल्याची तसेच दिराने शरीरसुखाची मागणी केल्याप्रकरणी देहूरोड पोलीस ठाण्यात पीडित महिलेने तक्रार दिली आहे. याप्रकरणी पती, सासू आणि दिराविरोधात देहूरोड पोलिसात गुन्हा दाखल करण्यात आला आहे. पोलिसांच्या माहितीनुसार, ११ जून २०२० ते ७ ऑगस्ट २०२० पर्यंत संबंधित पती, सासू आणि दिराने विविध कारणावरून पीडित महिलेचा छळ केला असल्याचं तक्रारीत म्हटलं आहे. आरोपींनी शिवीगाळ करुन पीडित महिलेला डुक्कराचं मटण खाण्यासाठी जबरदस्ती करुन जीवे मारण्याची धमकी दिली तसेच माहेरहून गाडी आणण्यासाठी सक्ती करीत मानसिक आणि शाररिक छळ केला. शिवाय, पतीने पट्टयाने मारहाण करून दुखापत केली आणि दिरानं शिवीगाळ करुन शारिरिक संबंधाची मागणी करुन विनयभंग केला असं पीडित महिलेनं तक्रारीत म्हटलं आहे. याप्रकरणी देहूरोड पोलीस ठाण्यात पतीसह सासरच्या व्यक्तींविरोधात गुन्हा दाखल करण्यात आला असून त्यांना अद्याप अटक झालेली नाही, अशी माहिती पोलिसांनी दिली आहे.
