देशामध्ये रोज नवीन विक्रम प्रस्थापित करणाऱ्या ‘बाहुबली दोन’ या चित्रपटाने पुणे शहर व जिल्ह्य़ात एका आठवडय़ात पाच कोटी ४८ लाख रुपयांचा करमणूक कर महसूल विभागाला मिळवून दिला आहे. एका आठवडय़ात जिल्ह्य़ात सर्वात जास्त करमणूक कर गोळा होण्याचा नवा विक्रम या चित्रपटाने प्रस्थापित केला आहे. हा चित्रपट अजून महिनाभर सर्व चित्रपटगृहांमध्ये राहण्याची शक्यता असून चित्रपटाला मिळणारा प्रतिसाद पाहता महिनाभरात आणखी कोटय़वधींचा करमणूक कर वसूल होण्याची शक्यता जिल्हा प्रशासनाने वर्तवली आहे.
सांस्कृतिक शहर म्हणून ओळखल्या जाणाऱ्या पुण्यात नाटय़, चित्रपटांना चांगली पसंती मिळते. शहरातील बहुपडदा आणि ३१ चित्रपटगृहांत दाखवल्या जाणाऱ्या चित्रपटांकडून सुमारे चार कोटींचा महसूल जमा होतो. गेल्यावर्षभरात करमणूक कर विभागाकडे चित्रपटांच्या माध्यमातून सुमारे ६५ कोटींचा कर जमा झाला. २८ एप्रिलला एस. एस. राजामौली दिग्दर्शित ‘बाहुबली दोन’ हा चित्रपट हिंदी, मल्याळमसह पाच भाषांत प्रदर्शित झाला. बिग बजेट, बहुचर्चित, उत्कृष्ट अ‍ॅनिमेशन आणि स्पेशल इफेक्ट यामुळे चित्रपटाला प्रेक्षकांची चांगलीच पसंती मिळाली. जगभरातील नऊ हजार चित्रपटगृहात हा चित्रपट प्रदर्शित करण्यात आला आहे. तर शहर व जिल्ह्य़ातील अनेक चित्रपटगृहांत प्रतिदिवशी चित्रपटाचे तीनशेपेक्षा जास्त खेळ सकाळी आठ वाजल्यापासून सुरु आहेत. चित्रपटाची तिकिटे शंभर रुपयांपासून सहाशे रुपयांपर्यंत आहेत. शहर व जिल्ह्य़ातील सर्व चित्रपटगृहे मिळून पाच कोटी ४८ लाख रुपयांचा कर जमा झाला असून एकूण आठ ते दहा कोटींपेक्षा अधिक कर वसूल होण्याची शक्यता जिल्हा प्रशासनाने व्यक्त केली आहे. ‘मे महिना करमणूक कर विभागासाठी विशेष असतो. नुकत्याच प्रदर्शित झालेल्या बाहुबली चित्रपटातून चांगला करमणूक कर मिळाला आहे. पुढील दोन महिन्यात काही मराठी, हिंदूी चित्रपट प्रदर्शित होत असून त्यातूनही चांगला कर मिळेल’, असे करमणूक कर विभागाच्या तहसीलदार सुषमा चौधरी यांनी सांगितले.
‘बाहुबली एक’ चित्रपटातून शहर व जिल्ह्य़ात पाच दिवसांमध्ये ७८ लाख रुपयांचा करमणूक कर वसूल झाला होता. तर ‘बजरंगी भाईजान’ चित्रपटातून दोन आठवडय़ांमध्ये एक कोटीच्या आसपास करमणूक कर वसूल झाला होता.
