पिंपरी-चिंचवडमधील देहूरोड येथे दिवाळी सणाच्या पार्श्वभूमीवर बाजारपेठ आणि गर्दीच्या ठिकाणी साध्या वेशात गस्त घालत असेलल्या गुन्हे शाखेच्या एका पोलीस कर्मचाऱ्याला लाथाबुक्क्याने मारहाण करण्यात आल्याची घटना घडली आहे. याप्रकरणी मारहाण करणाऱ्या व्यक्तीविरोधात सरकारी कामात अडथळा आणल्याचा गुन्हा दाखल करण्यात आला असून, त्याला अटक करण्यात आली. ही घटना शनिवारी रात्री सव्वाआठ वाजता देहूरोड बाजार येथे घडली. दरम्यान, मारहाणीचा सीसीटीव्ही समोर आला असून लाथा बुक्क्यांनी मारहाण केल्याच सीसीटीव्हीत दिसत आहे. अरविंद लक्ष्मण ढिल्लोड (रा. पारशीचाळ, देहूरोड) असे अटक केलेल्या आरोपीचे नाव आहे. याप्रकरणी पोलीस शिपाई ज्ञानेश्वर गाडेकर यांनी देहूरोड पोलीस ठाण्यात फिर्याद दिली आहे.
