ज्येष्ठ पत्रकार द्वारकानाथ लेले (वय ८१) यांचे वृद्धापकाळाने शनिवारी निधन झाले. त्यांच्यामागे दोन विवाहित मुली, जावई आणि नातवंडे असा परिवार आहे. पुणे विद्यापीठाच्या संज्ञापन आणि वृत्तपत्रविद्या विभागातील प्रा. उज्ज्वला बर्वे या त्यांच्या कन्या होत.टपाल खात्यामध्ये काही काळ काम केल्यानंतर लेले यांनी समाचार भारती या वृत्तसंस्थेचे पुण्यातील प्रतिनिधी म्हणून काम पाहिले. ते साप्ताहिक सकाळ, सकाळची नाशिक आवृत्ती व साप्ताहिक स्वराज्यचे संपादक होते. तरुण भारत या दैनिकातही त्यांनी काम केले होते. पुण्यातील पत्रकारनगरच्या उभारणीत त्यांचे मोठे योगदान होते. सानेगुरुजी कथामाला, अंधश्रद्धा निर्मूलन समिती, कथाकथन प्रबोधिनी, सदाचार भारती, काव्यशिल्प यांसह पनवेल येथील शांतिवन वृद्धाश्रमाच्या कामातही त्यांचा सक्रिय सहभाग होता. धार्मिक विधी न करता लेले यांच्या पार्थिवावर वैकुंठ स्मशानभूमीत अंत्यसंस्कार करण्यात आले.