पुणेकरांचे आकर्षण ठरणाऱ्या फळाफुलांच्या प्रदर्शनाचा प्रारंभ

 पुणेकरांसाठी पर्वणी ठरणाऱ्या संभाजी उद्यानातील फळाफुलांच्या प्रदर्शनाला शनिवारपासून सुरुवात झाली. पर्यावरण, फुलाफळांची लागवड, बागांची जोपासना, फुलांची सजावट आदी गोष्टींची मनापासून आवड असणाऱ्यांसाठी हे प्रदर्शन दरवर्षी आकर्षण ठरते.
नागरिकांमध्ये पर्यावरणाची आवड निर्माण होण्याच्या दृष्टीने सुरू करण्यात आलेल्या या प्रदर्शनाचे यंदा चौतिसावे वर्ष आहे. महापालिकेच्या वर्धापनदिनानिमित्त हे प्रदर्शन संभाजी उद्यानात दरवर्षी भरवले जाते आणि यंदाही त्याला पहिल्या दिवशी मोठा प्रतिसाद मिळाला. महापौर चंचला कोद्रे यांच्या हस्ते प्रदर्शनाचे उद्घाटन करण्यात आले. राज्याच्या कृषी विभागाचे माजी संचालक अप्पासाहेब भुजबळ, अतिरिक्त आयुक्त राजेंद्र जगताप यांची या वेळी प्रमुख उपस्थिती होती.
बागा आणि सजावटीची आवड असणाऱ्या नागरिकांसाठी विविध विषयांवरील स्पर्धा, विविध रोपवाटिकांचा सहभाग व मांडणी, बागांसंबंधीची अवजारे, खते, बियाणे आदी साहित्याची रास्त दरात विक्री, विविध कल्पनांवर आधारलेल्या भव्य व सुंदर सजावटी, निसर्ग चित्र, छायाचित्र हे यंदाच्या प्रदर्शनाचे वैशिष्टय़ आहे. पानाफुलांच्या रचना, बाग रचना, पुष्पगुच्छ, रांगोळ्या, प्रक्रिया केलेले खाद्यपदार्थ, हार, कुंडय़ांमधील फुलझाडे, फळे, घरगुती बागेतील भाजीपाला, तजेलदार फळभाज्या, जनजागृतीपर संदेश देणारे देखावे आदी अनेक गोष्टींचा समावेश या प्रदर्शनात आहे. संभाजी उद्यानात सुरू झालेले हे प्रदर्शन रविवारी (१६ फेब्रुवारी) दिवसभर सर्वासाठी नि:शुल्क खुले आहे.