पाणीपुरी खाल्यानंतर पैसे मागितल्याने दोन गुंडांनी पाणीपुरी विक्रेत्यावर चाकूने वार केल्याची घटना शनिवारवाडा परिसरात घडली. राजेंद्रसिंग दयाराम जाठम (वय २२, रा. मंगळवार पेठ) असे जखमी झालेल्या पाणीपुरी विक्रेत्याचे नाव आहे.
जाठम याने या संदर्भात फरासखाना पोलीस ठाण्यात फिर्याद दिली आहे. जाठम शिवाजी रस्त्यावर पाणीपुरी विक्रीचा व्यवसाय करतो. दोन दिवसांपूर्वी दोघेजण रिक्षातून शनिवारवाडा परिसरात आले. त्यांनी जाठम याच्याकडून पाणीपुरी घेतली. जाठम याने पाणीपुरीचे पैसे मागितले. तेव्हा दोघांनी त्याच्यावर चाकूने वार केले. त्यानंतर शिवीगाळ करून दोघेजण रिक्षातून पसार झाले. सहायक पोलीस निरीक्षक शिंदे तपास करत आहेत.
