पाच वर्षांच्या मुलाचा बहिणीच्या सतर्कतेमुळे उधळला अपहरणाचा कट

 मुंढवा येथे पाच वर्षांच्या मुलाच्या अपहरणाचा कट मोठय़ा बहिणीच्या सतर्कतेमुळे उधळला गेला . दुचाकीवरून आलेले दोघे पाच वर्षांच्या मुलाला घेऊन जाताना त्याच्या मोठय़ा बहिणीने पाहिले. मोठय़ाने ओरडल्यामुळे एका नागरिकाने त्यांचा पाठलाग केला. त्याच बरोबर पोलिसांनाही तातडीने कळविले. त्यामुळे तीन मिनिटांमध्ये मुंढवा पोलिसांनी घटनास्थळी पोहोचत नागरिकांच्या मदतीने मुलाची सुटका करत एकास जागेवर आणि दुसऱ्याला केशवनगर येथून अटक केली. मुंढवा येथील जॅक अ‍ॅन्ड जिल शाळेजवळ सोमवारी दुपारी ही घटना घडली.
सुमीत पारसनाथ प्रसाद (वय ५, रा. केशवनगर) असे अपहरणाचा प्रयत्न झालेल्या बालकाचे नाव आहे. या प्रकरणी आशिष लालचंद शुक्ला (वय १८) आणि आदित्य शामवैभव चतुर्वेदी (वय २०, रा. दोघेही- केशवनगर) यांना अटक करण्यात आली आहे. याबाबत मुंढवा पोलीस ठाण्याचे वरिष्ठ पोलीस निरीक्षक विश्वनाथ घनवट यांनी सांगितले, की मुंढव्यातील ‘जॅक अ‍ॅन्ड जिल’ शाळेतून घरी जाताना सुमीत यास दुचाकीवरून आलेल्या दोघे मध्ये बसवून घेऊन जात होते. त्या वेळी सुमीतपेक्षा मोठी असलेल्या त्याच्या बहिणीने पाहिले. मोठय़ाने आरडाओरडा केला. त्या वेळी त्या ठिकाणी असलेले आझाद गुलाम चौधरी यांनी त्या दोघांचा पाठलाग केला. तर, हा प्रकार पाहून श्रीकृष्ण कोद्रे यांनी पोलिसांना फोन केला. तीन मिनिटांमध्येच मी आणि पोलीस कर्मचारी चव्हाण, गांदले त्या ठिकाणी पोहोचलो. त्यातील एकाला नागरिकांच्या मदतीने पकडले. त्याच्याकडून मिळालेल्या माहितीवरून दुसऱ्याला काही वेळाने अटक केली आहे. सुमीतचे वडिलांचा लेबर कॉन्टक्ट्ररचा व्यवसाय आहे. हे दोघेही आरोपी केशवनगर भागातील असून त्यातील एकाची सुमीतच्या वडिलांशी ओळख आहे. या दोघांनी दहा लाख रुपयांच्या खंडणीसाठी सुमीतचे अपहरण करण्याचा कट रचला असल्याचे पोलिसांना सांगितले आहे.