पुणे : जमीन अकृषिक (नॉन अग्रीकल्चर - एनए) झाली असली, तरी नागरिकांना गावठाणाबाहेरील बांधकामासाठी तसेच विकासकामांसाठी पुणे महानगर प्रदेश विकास प्राधिकरणाची (पुणे मेट्रोपोलिटन रिजन डेव्हलपमेंट अॅथॉरिटी - पीएमआरडीए) परवानगी बंधनकारक असल्याचे प्राधिकरणाकडून बुधवारी स्पष्ट करण्यात आले आहे. शासनाने गावठाणापासून २०० मीटरच्या आतील जमीनमालकांना अकृषिक परवान्याच्या (एनए) परवानगीची आवश्यकता असणार नाही. केवळ जमीनमालकांनी अकृषिक कराचे चलन भरल्यानंतर त्यांना सनद मिळणार आहे, असा निर्णय घेतला आहे. या निर्णयावर काही नागरिकांच्या मनात संभ्रम निर्माण झाला आहे की, आता जमीन अकृषिक झाली तर बांधकाम परवानगी घेण्याची आवश्यकता नाही. तसेच काही अनधिकृत बांधकाम करणाऱ्यांनी जमीन अकृषिक झाली, असे सांगत बेकायदा प्लॉटिंग करण्यास सुरुवात केली. यामधून नागरिकांची फसवणूक होण्याची शक्यता आहे. या पार्श्वभूमीवर गावठाणाबाहेरील २०० मीटर हद्दीतील जमीन मालकांना अकृषिक वापर सुरू करण्यापूर्वी तहसीलदार यांच्याकडून अकृषिक कर आकारणी करून अकृषिक कर व रुपांतरीत कर भरायचा आहे. त्यानंतर सनद प्राप्त करून घेणे आणि त्यासोबतच पीएमआरडीएकडूनही महाराष्ट्र प्रादेशिक व नगर नियोजन अधिनियम १९६६ मधील तरतुदीनुसार विशेष नियोजन प्राधिकरण म्हणून पीएमआरडीएची विवक्षितरीत्या विकास / बांधकाम परवानगी घेणे अनिवार्य आहे. पीएमआरडीएने जमीन अकृषिक झाली असली, तरी बांधकाम परवानगी घेणे बंधनकारक असल्याचे बुधवारी स्पष्ट केले. महाराष्ट्र प्रादेशिक व नगर नियोजन अधिनियमानुसार, विशेष नियोजन प्राधिकरण म्हणून पीएमआरडीएची बांधकाम परवानगी घेणे अनिवार्य आहे. गावठाण हद्दीबाहेर बांधकाम परवानगीचे अधिकार पीएमआरडीएला आहेत. बांधकाम परवानगीसाठी अर्ज केल्यानंतर या प्रस्तावाची छाननी करण्यात येते. त्यानंतर पीएमआरडीएकडून बांधकाम परवानगी दिली जाते. पीएमआरडीएची बांधकाम परवानगी न घेता बांधकाम केल्यास अशा बांधकामांवर कारवाई करण्याचा इशाराही पीएमआरडीए प्रशासनाकडून देण्यात आला आहे. एक-दोन गुंठय़ांच्या भूखंडांची खरेदी-विक्री करताना त्या आराखडय़ास पीएमआरडीएची परवानगी घेणे आवश्यक आहे. पीएमआरडीएची परवानगी घेऊनच भूखंडाचे हस्तांतर अथवा त्यावर बांधकाम करावे. तसेच अकृषिक वापरासाठी प्रमाणभूत क्षेत्रापेक्षा कमी क्षेत्राच्या भूखंडांची खरेदी- विक्री करण्यासठी पीएमआरडीएकडून रेखांकन आराखडय़ाला मान्यता घेऊनच भूखंडांचे हस्तांतरण व विकास / बांधकाम करावे. - सुहास दिवसे, महानगर आयुक्त, पीएमआरडीए